India rama Football-a inelna sang ber, I-League Champion lai Aizawl FC leh Mizoram State AIDS Control Society ten vawiin khan HIV/AIDS darh zel tur ven kawnga thawk dun turin inremna thuthlung an ziak. He inremnaah hian MSACS aiawhin Project Director, Dr. Lalmalsawmi Sailo leh Aizawl FC aiawhin President, Pu Robert Romawia Royte ten hming an ziak a ni. Inremna an siam dan chuan Aizawl FC Academy 4 -Zawlnuam, Kawnpui, Khawzawl leh Lengpuiah MSACS nen thawk dunin HIV/AIDS darh zel tur ven kawngah hma an la dawn a ni. Aizawl FC President, Pu Robert Romawia Royte chuan, zu leh ruihhlo chi hrang hrang do kawngah Aizawl FC chuan theihtawpin hma a lo la tawh thin tih sawiin, Zu siamtu Company lian tak takin thawhpuia an sawmna pawh an lo hnawl tawh thin niin a sawi.
