Aizawl Municipal Corporation-a thawktuten kumin atana inhlan tharna hun an buatsaih hmanpuitu Dy. Chief Minister Pu Tawnluia’n AMC in chak zawka hna a thawh theih nan Mayor leh Deputy Mayor te dinhmun tichak turin sorkarin Mizoram Municipalities Amendment Act 2019 a siam tih a sawi.

UD&PA changtu nibawk Pu Tawnluia hian AMC ah Executive Council pawh reiloteah din a ni dawn a, hna thawk theiin a awm thuai dawn a ni a ti. Pu Tawnlui chuan, AMC-a thawktu indaih lohna phuhrukna turin Recruitment Rules pawh sorkarin a duang fel tawh tih a sawi a, Aizawl khawpuia cheng te hmasawn nan nasa takin AMC in hma a la a, lirthei dah dan ruahmanna siam te, Traffic tawt tih ziaawm nan lirthei dahna tur in chhawng Multi-level Car Parking Projects te, faina lama hmasawn nan Tuirial Dumping Ground a bawlhhlawh hal tawhloa mumal taka sawngbawlna hmun tur Solid Waste Management Facility te siam a ni a ti a, SIPMIU kaltlanga sak bawlhhlawh sawngbawlna hmunah hian khawpuia bawlhhlawhte awmze neia sawngbawl hna thawh mek a ni a ti.

Inkhawmah hian Mayor Pu PC Lalhmingthanga, Pu C Lalmuanpuia MLA leh UD&PA Secy Dr. C. Vanlalramsanga te pawhin thu an sawi a ni.