Aizawla Independence Day lawmna

0
499
views

Ram zalenna ni champha, vawi 70-na chu ram chhung hmun dang rualin Mizoramah pawh lawm a ni a, a lawmna pui ber, Aizawl Lammualah CM, Pu Lal Thanhawla’n hnam puanzar pawt pharhin, Parade-te chibai a chhang let a. Ram zalenna ni hian mi tin thinlungah inpekna thuk zawk thlen se a duh thu sawiin, ramin dinhmun sang zawk a thlen theih nana theihtawp chhuah tura inhlan tharna ni atana hmang turin mipuite a sawm a ni. Pu Lal Thanhawla chuan, tun hnaia ruahsur nasa avanga Mizoram hmun hrang hranga chhiatna thleng leh, tun thlenga Tlabung leh a chhehvel mipuiten tuilian avanga harsatna an tawk chu pawi a tih thu sawiin, nunna chan ta chhungte zangnadawmna pe turin sorkar laipuiah pawisa dil mek a ni, a ti a, state dangte rualin tanpuina hi hmuh ngei beisei a nih thu a sawi. Pu Lal Thanhawla chuan, ruihhlo chu Mizoram hmelma lian ber a ni ta nia sawiin, thalai tam tak a tihbuai avangin a do beihpui thlak tum a nih thu leh tun hnaia Social Welfare Department-in a zir chianna, Base Line Survey Report zul zuia hnathawh a nih tur thu a sawi. Ram hmasawnna tehfung pawimawh ber pakhat chu inkal pawhna kawngpui tha a ni tih sawiin CM chuan, Mizoram chu ram chhunga inkalpawhna kawngpui nei tha berte zinga mi niin a sawi a, hmun thenkhata kawngpui chhe deuh awm chu fur lai a nih avangin siam that theih a ni rih lova, a chhe zual lai chu thal a nih veleh siam that nghal tum niin a sawi. Inkalpawhna tha nei turin Bairabi atanga Sairang thleng rel kawng siam a nih bakah Sairang atanga Kawrpuichhuah leh Kawrpuichhuah atanga Lawngtlai thleng, rel kawng sialna tur pawh tun thal lo awm turah hian survey zawh hman tum niin CM chuan a sawi a, a hlawhtlin hunah Mizoram chu Asia chhim chhak ramte insumdawn tawnna luhka pawimawh a ni tawh dawn a, hei hi India chauh ni lo, ram thenawmte pawhin an nghakhlel tawh hle nia sawiin, hemi ken tel, thlawhtheihna tumhmun pawh Siaha District-a Latawh khuaah siam tum a ni a, tun thalah hian survey zawh hman tum a ni, a ti bawk.

Pu Lal Thanhawla chuan, ram than zelna kawngah kawlphethaa intodelh a pawimawh thu sawiin, kawlphetha megawatt 60 pe chhuak thei tur Tuirial Hydro Electric Power Project chu thla khat hnuah hawn theih beisei a nih thu leh ni zung chakna hmang kawlphetha siamna atan Vankal daihah Megawatt 20 pe chhuak thei tur leh Tlungvelah Megawatt 2 pe chhuak thei tur buatsaih mek a ni thu a sawi bawk. Mirethei leh harsa zawkte an din chhuah theihna tura thawh chu sorkar thil tum lian berte zinga mi a ni tih sawiin, Pu Lal Thanhawla chuan, hemi atan hian NLUP chu chhunzawm zel a ni dawn niin a sawi a. NLUP chu changtlung zawkin NEDP-a chhunzawm a ni dawn a, hemi hnuaiah hian mipuite intodelhna bakah ram chereu zel tur ven kawngah tan lak a ni dawn niin a sawi. CM chuan, thenawm state-a ring lo mite puihna tel lova khawsa thei lo nih chu a ropui lo nia sawiin, tun dinhmuna Mizoramin a mamawh ber chu rinawmna leh dikna nena hmasawn tura theihtawp chhuah a ni a, chumi a hlawhtlin hunah chuan chanchin tha pawh huam zau zawkin a hril theih dawn niin a sawi a ni.

Vawiina Lammuala Independence Day lawmnaah hian kum danga la tih ngai loh, India ram thar siam tura intiamna chu sorkar laipui duh dan angin CM, Pu Lal Thanhawla’n a tiam a. He thutiam hi kum 2022 thlen hmaa India ram thar siam tura faina bawhzuina tur te, eirukna, rawlrala chetna, hnam inthliarna leh chi leh chi inthliarna tibo tura intiamna te a ni a. CM, Pu Lal Thanhawla chuan, he thutiamah hian sakhaw zalenna telh ni se a that lehzual a rin thu a sawi. Lammuala Independence Day lawmna hi zing dar 9-ah tan a ni a, CM hian hnam puanzar pawt pharhin, Parade contingent 28-te hnam puanzar chibai buk a chhang let a. Huaisen Lawmman, Sarvottam Jeevan Raksha Padak Award, 2016 dawngtu Roluahpuii, Darlawn, Uttam Jeevan Raksha Padak Award dawngtu, Pu Churchill-a, Aizawl Electric Veng leh Pi Roluahpuii, Sakawrdai, Jeevan Raksha Padak Award dawngtu Pu Isaac Lalrinchhana, Thingsulthliah te chu chawimawina a hlan a. Zirtirtu tha chawimawina, State Award for Teachers, 2017 dawngtu Govt. Chhiahtlang High School Headmistress, Pi K. Zoramchhani, Govt. TS Luaia Middle School Headmaster, Pu R. Lalzokima leh Govt. Primary School -I, Pukpui Headmistress, Pi Lalmuankimi Khiangte leh Police hnathawk tha, Governor Gold Medal dawngtu Sub-Inspector Pu J.H. Chunglianthanga pawh lawmman a hlan bakah, Parade Contingent tithate hnenah lawmman a hlan bawk. Vawiina Lammuala Independence Day lawmnaah hian President’s Police Medal for Distinguished Service dawng turin AIGP-II Pu Lalbiakthanga, President’s Medal for Meritorious Service dawng turin MPRO SP, Pu PC. Lallianthanga, 3 IR Commandant, Pu K.Lalremsanga, Inspector Pu Vanlaltluanga Parte leh Union Home Minister’s Medal for Excellence in Police Training dawng turin Hav. Daniel Ramhluna, Police Training School Thenzawl thlan an nih thu puan a ni bawk. Tun hnai atanga tih thin angin Aizawla Independence Day lawmnaah hian Manipur-a 3rd IR Battalion chu Armed Contingent zingah an tel a, Mizoram atang pawhin Assam-a Dispur-a Independence Day lawmnaa tel turin 3rd Battalion MAP Contingent an kal a ni.

Lammuala Independence Day lawmna zawh a nih hnu hian Larsap, Lt. General Nirbhay Sharma chuan a chenna Raj Bhavan-ah sawm bikte tan thingpui ruai a buatsaih a, CM, Pu Lal Thanhawla, CM hlui, Pu Zoramthanga, Minister, MLA leh sorkar mi pawimawh thahnem tak an tel a ni.