AMC huam chhunga phalna tel lova fakna leh hriattirna thu tar seng hawi mek a ni

0
1336
views

Aizawl Municipal Corporation (AMC) huam chhunga phalna tel lova fakna leh hriattirna thu tar, Hoarding, Banner leh Poster-te chu tunlai hian seng hawi mek a ni a. AMC hotute hnen atanga Zonet thu dawn danin, he thil hi Display of Advertisement and Hoarding Regulation, 2013 tlawhchhana tih a ni a, he dan tlawhchhan hian AMC chuan kumin July ni 26 khan chanchinbu-ah hriattirna a tichhuak a, August ni 15 hnua phalna tel lova Hoarding, Banner leh Poster tarte chu la thla vek turin a hriattir a ni. He thupek bawhzuai hian AMC chuan August ni 28 atang khan Ward No. 1 huam chhung, Durtlang leh a chhehvela hetiang thil tarte chu a en fiah tan a, phalna tel lova tarte chu rawng senin ‘X AMC’ tih ziah hnan zel a ni. Aizawl Mayor, Pu PC. Lalhmingthanga chuan, phalna tel lova hetiang thil tar tihchhiat a nih chungchang hi a hriatpui lo niin Zonet a hrilh a, AMC hnuaiah Hoarding Sub-Committee a awm a, anni pawhin he thupek hi an hriatpui loh thu leh, a hriatpuinaa tih chu ni se tun ang rup rupa thil tih a nih a rin loh thu a sawi. AMC hotute chuan, hei hi Ward dangah pawh bawhzui zel tum a nih thu leh, hetih rual hian Durtlang leh a chhehvela an tih dan aia nem deuh zawka tih tum a nih thu an sawi a, an tih tawh chinah midang rilru tihnat an neih chuan mipuite hriatthiam an dil tih an sawi.

Ward No. 1 Councillor, Pi R. Zomuanpuii chuan, a bial chhunga Hoarding, Banner leh Poster tihchhiat a nih chungchang hi a hriatpui lo niin a sawi a, AMC hotute hnen atang pawhin a bial chhunga hetiang thil tih tum a nih thu hi a dawn loh thu leh hetianga thil tih a nih dawn chuan zau zawka mipui hriattirna tihchhuah hmasak awm nia a ngaih thu a sawi a. AMC-in hetiang thil tar a tihchhiat tam zawk chu sumdawnna kaihhnawih pawh ni lo, Kohhran, YMA leh tlawmngai pawl dangte thu tar a nih avangin thuziak tichhe lo hian, an tartute chu la thla tura hriattirna pek ni se tha zawk tura a ngaih thu a sawi. Durtlang, Leitan leh Durtlang North Joint YMA chuan an huam chhunga heng thil tar tihchhiat a nih chungchang hi naktuk chawhnu lam hian an ngaihtuah dawn nia hriat a ni. AMC-in August ni 28 atanga Hoarding, Banner leh Poster an endikna atangin phalna tel lova tar 185 a hmu tawh a, chung zinga 84 chu an senghawi tawh a ni.