A lawmna hi Kohhran hrang hrangah an remchan dan angin neih a ni a, Aizawl Republic Venga BCM Central Church-ah leh Kohhran dang tam takah nizan khan Jubilee meidet a ni a, tukin khan Tanhrila Academy of Integrated Christian Studies (AICS) compound-ah Mizorama Pathian thuhril tura Kristian Missionary lo thleng hmasa pahnih Rev. FW Savidge Mizoten Sap upa tia hriat leh Rev. JH Lorrain, Pu Buanga tia hriat te hriatrengna lungphun chu Rev. PC Liandula’n a hawng a, hawnna inkhawma thusawiin Rev. PC Liandula chuan chanchin\ha-in kum 125 zet Mizoram a chenchilh tawh a, tuna Kohhran hrang hrangten an uar tur chu chanchin\ha thehdarh niin a sawi a ni.
Republic Venga BCM Central Church-ah Mizorama chanchin\ha thlen kum 125 tlin hriatrengna Jubilee dar \um 125 vuak a ni a, dar vaw tu tur te hi Kohhran hruaitute leh mi pawimawh thlan chhuahte an ni.
Mizoram-a Missionary hmasa ber pahnih Sap Upa leh Pu Buanga lo thlen champha vawi 125-na lawmnaah hian thupui atan “Isua Krista Khawvel Chhandamtu ” tih hman a ni a, vawiin chawhma inkhawm sermon-ah thusawitu tam tak chuan Mizoten chanchin\ha an dawn theihna tura Missionary tir chhuaktu Robert Arthington-a inpekna nasat zia te, chanchin\ha avanga Mizoten ham\hatna leh kawng hrang hranga hmasawnna an dawn te an sawi a ni.
BCM Central Church Committee-in a sawm angin Mizoram Larsap, Kummanam Rajasekharan chuan chanchin\ha thlen ni champha vawi 125-na lawmna ruai Republic Venga Central Church-ah Kohhran hruaitute a kilpui a, sa ei lo a ni tih hria-in Kohhran hruaitute chuan vegetarian chaw an lo buatsaih sak a, chu chu an kilhova, Larsap hian Kohhran hruaituten Mizorama chanchin\ha thlen dan an sawi a ngaihthlak bakah, Pathian faka zaikhawmnaah a tel bawk a ni.
