Bihar Assembly-ah buaina chhuak

0
346
views

Vawiin khan Bihar Assembly rorel inkhawmah inauh buaina nasa tak a thleng a, eptu pawl, Rashtriya Janata Dal (RJD) member-te an au nasat avangin rorel inkhawm hi tihtawp lailawk a ni. Eptu member-te hian state CM, Nitish Kumar leh Dy. CM, Sushil Kumar Modi chu Srijan an tih hnuaia sorkar sum, cheng vbc. tam tak tihchingpen nia sawi chungchangah bang turin an phut a, an hruaitu, Dy. CM hlui, Tejashwi Prasad Yadav-a hovin RJD member-te hi House atangin an chhuak tau a, pawna Karpoori Thakur-a lim bulah lungawi lohna lantirin an thu khawm a ni. State CM, Nitish Kumar-a chuan he thila sum chingpen nia sawi chungchang hi CBI chhuitir a rawt tawh a, he thila mawhphura puh mi pakhat chu Police kuta a awm laiin, a kal na avangin a thi nia sawi a ni. RJD MLA pakhat, Ejya Yadav-a chuan he thila sum chingpen nia sawi hi cheng vbc. 15,000 vel ni hialin a sawi. Tun thla ni 3 khan sorkar cheque, cheng vbc. 10 chu pawisa lak chhuah nana hman tum a nih laiin, heti zat pawisa hi a awm loh avangin he thil hi hriat a ni a, pawisa awm tura ngaih, sorkar pawisa, cheng vbc. tam tak chu dan kalhin, Bhagalpur district-a pawl pakhat, Srijan Mahila Sahyog Samiti an tih hnenah sawn a ni tih hriat chhuah a ni a, sawn tur hian Dist. Bawrhsap hming sign lem hman a ni. He thil hian Bhagalpur district pawn lam leh, department pakhat aia tam a nghawng rin a ni.