Buh leh bala intodelh tura tanlak meknaah Sialsuk ram, Lik zau leh Sailam ram, Lauphai Leilet tihhmasawn dan tur Agriculture Minister, Pu C. Lalrinsanga’n a en.

0
100
views

Aizawlah mihring nuai 3 vel an awm a, an ni tin ei ral ringawt pawh a tam tham avangin chung mite mamawh phuhru tura hmalak a tul a, sum lakluhna tha tak leh lenpuina tham a ni bawk tih Agriculture Minister hian a sawi a, tanla lehzual turin loneitute a chah a ni.

Agri & vety lam kaihnawih-ah nasa lehzuala tanlak tum a nih thu leh hei hi CM pawhin a ngaihpawimawh a ni tih Pu C Lalrinsanga hian a sawi a, ranchaw leh a kaihnawih pawh eizawnna tlak a tling thuai dawn tih a sawi.

Agriculture Minister hian, Mizoramah hun engemawchen Covid 19 hri kai an awm loh hnuah tun hnaia hri kai hmuhchhuah chuan mipui rilru tichiai lo se a duh thu a sawi a. Covid 19 vangin khawvel sum leh pai dinhmun a tlahniam mek a, Mizoram pawh nasa takin a nghawng a, tun dinhmunah sum tam tak pawh nei ila, nunna pui ber ei tur a awm si loh chuan awmzia a awm dawn lo a, ei leh bara intodelh tura tanlak a tul a ni, a ti a. Mizoramin buhfai a lakluhna State dangah pawh hri leng vanga harsatna an tawh avangin kumdang angin buhfai lakluh tur a tam lo thei a, harsatna a thlen loh nan intodelh a tul a ni a ti.

Minister tawiawmtu Agriculture Development Biard Vice Chairman, Pu H. Biakzauva MLA leh Aizawl South III Bialtu MLA, Horticulture Development Board Vice Chairman, Dr.F. Lalnunmawia te pawhin loneitute fuihna thu an sawi a ni.

Lau farming society hruaitute sawi danin, Lauphai zau-ah hian chhungkaw 40 velin leilet Hectare 20 vel a zau an siam tawh a, tunah hian siam loh hectare 40 vel a la awm a, chungte chu tui lakna tha tawk lo leh a panna kawng that tawk loh vanga siam loh a ni. Hetiang bawk hian Sialsuk-ah leilet nei chhungkaw 80 vel an awm a. Leilet siam tawh zawng zawng chu hectare 120 vel a zau a nih laiin, siam loh hectare 60 atanga 80 vel a la awm a. Kumin hian Sialsuka leilet neituten buh chi tin 160 vel an phun dawn a, nikum lamah khan tin 120 an phun a ni.

Agri. Minister leh Dept hotute hian leilet neitute tha tih chak dan tur leh an mamawh phuhruk dan tur an enpui a ni.