Burkina Faso-ah mi firfiakte’n mi 18 kaphlum

0
899
views

Africa khawmualpui thlang lama ram pakhat, Burkina Faso khawpui, Ouagadougou-a khualzinte ei leh inna hmun pakhatah nizan khan mi firfiakte’n mi 18 vel an kap hlum a, pawi khawihtu pahnih hi sipaiten an kap hlum bawk. Burkina Faso Communications Minister, Remis Dandjinou-a sawi danin, pawi khawihtute hi eng zat chiah nge an nih hriat a ni lo a, he thil thlengah hian mi eng emaw zat an hliam a, sipaite’n mi firfiak dang an awm leh awm loh zawngin hmun hrang hrang an dap mek a ni. He restaurant neitu hi Turkey mi a ni a, nikum January thla khan helai hmun atanga metre 200-a hlaa hotel leh cafe chu mi firfiak pawlten beiin, mi 30 vel an lo that tawh a, thi zingah hian khualzin an tam hle a ni. Police-te chuan a hmuna awmte thusawi sawi chhawngin, nizan dar 9 vel khan bike-a chuang mi pahnihin AK rifle hmangin retaurant hi an pawng kah niin an sawi a, restaurant hnathawk pakhat chuan dar 9:30 vel khan mi pathumin restaurant-a chawlte an kah rawn niin a sawi thung. Nizan dar 10:15 vel khan sipaite leh police-te chuan mi firfiakte hi bei letin, tukin dar 5 thleng khan an inkap nia sawi a ni.