Central YMA bultuma ILP endik runpui neih vangin diltu pung nasa

0
547
views

Tun hnaia Central YMA bul tuma hnamdang Inner Line Permit endik runpui neih a nih avangin tunlai hian Aizawl Bawrhsap pisa-ah ILP dil an pung nasa hle nia hriat a ni a, Bawrhsap pisa-a ILP pe chhuaktute chuan, tum dangah chuan ILP dil hi ni khatah mi 30-40 vel an ni thin a, tunah chuan ni khatah 100 chuang an awm deuh ziah niin Zonet an hrilh a ni. ILP dil zingah hian Company hnuaia inhlawhfa an tam ber a, dawr nghak turte, Motor Workshop-a thawk tur leh in sakna leh hmun danga hnathawk tur an awm nual bawk niin an sawi. ILP dil tur hian Mizorama luh phalna, Inner Line Permit bakah Aadhar card emaw, Voter ID emaw, Pancard emaw leh anmahni chhawrtu turte awmna venga Local Council hriatpuina leh Voter ID thil tel a ngai a. ILP dilna Form hi pakhat cheng 50 zela hralh a ni a, Rs. 270 a khul theih a ni. A hlui tihnun dilna Form chu cheng 20 man a ni a, a khul chhuah nan cheng 150 a ngai thung a, anmahni chhawrtu turten Bank-ah Rs. 1,000 an dahkham a ngai bawk. ILP dilna thehlut tur hian a diltu bakah anmahni chhawrtu turte an inlan tel a ngai a, a chhawrtu tur a hman loh pawhin an chhungkaw zinga tuemaw tal a kal a ngai a ni. Mizorama luh phalna Inner Line Permit hi Lengpui tumhmun, Vairengte Police Check Gate, Bairabi Rel Station leh Silchara Mizoram House atangin lak chhuah theih a ni. ILP buaipuite chuan, a dilna Form-ah dan zawm tur chi hrang hrang tarlan a ni chungin, a dilpuituten an chhiar chian loh thin avangin harsatna tam tak an tawh phah niin an sawi a, ILP dilna thehlut turte chuan dan zawm ngaite hre hmasa vek thei se an duh thu an sawi. Kumin January thla atanga July thla thleng khan Aizawl Bawrhsap Pisa atang hian ILP 4,388 pek chhuah a ni tawh a, heta tang hian Rs. 8,77,600 hmuh tawh a ni.

Central YMA Kumpuan Committee Chairman, Pu Vanlalruata chuan, ILP endik runpui hi kum tin neih thin a nih thu Zonet a hrilh a. Kuminah pawh tun thla laihawl khan Branch YMA tinah ILP endik runpui hi neih a ni a, hetah hian ILP nei lo, hnam dang mi 550 vel hmuh chhuah an ni a, heng mite hi Police kutah hlan an nih hnuah an awmna hmuna thawn haw vek an nih thu a sawi. Pu Vanlalruata chuan, an endik apianga ILP nei lo emaw, thi tawh emaw, a lem emaw man tur tam tak a awm ziah chu tha lo a tih thu leh ILP chungchangah sorkar hotute chu tun aiin khauh deuh se an duh thu a sawi a. Hnam dang in luahtirtu zingah pawh ILP an neih leh neih loh chu sawi loh, an ina cheng zat takngial pawh hre lo an awm thin nia sawiin, hnam dang in luah tir thinte chu khauh zawkin kal thei se an duh thu a sawi. Central YMA Vice President chuan, ILP lem man tur awm thin chu thil tha lo tak a nih avangin, a lem siam thinte pawhin sim se an duh thu a sawi bawk.