Chakma tlawmngai pawlte’n Kamalanagar-ah kawng zawh

0
894
views

Mizoram Quota-a MBSS zir tura Chakma zirlai 4 thlan MZP in an dodal duh loh lan tir nan Chakma tlawmngai pawl hrang hrangten vawiin khan Kamalanagar-ah kawng an zawh. Chawhma dar 11-ah Kamalanagar-I Public Play Ground atanga tanin kawng zawh tute hian Kamalanagar II-a Chawngte SDO (Civil) Office thleng an zawh a ni. Heng mite hian SDO Civil kaltlangin Higher & Technical Education Minister Pu R. Romawia hnena Memorandum thehluh an tum a, hei hi MZP hruaitute chuan rem an tih loh avangin an thehlut ta lo nia hriat a ni. Chawngte atanga Zonet thu dawn danin, Aizawl leh Lunglei atanga kal MZP hruaitute chuan tukin khan Chakma tlawmngai pawl hruaitute hi bia-in kawng zawh an tum chu thulh turin an ngen a, hun eng emaw chen an inbiak hnuah Chakma-te hian kawng an zawh ta tho a ni. Kawng zawhtute hian Mizorama cheng dangte nen chanvo thuhmun neih an duh thute, hnam tenau zawkte chanvo chu Politics khelhna hmanrua atana hmang lo tur leh Chakma-te chu khawvel dang atanga kal ni lovin India khua leh tui dik tak an ni tiin an au a, an thil phut tarlang thei thuziak hrang hrang an keng bawk a ni. Kawng zawhtute hian Chawngte-a SDO (Civil) kaltlanga Higher & Technical Education Minister Pu R. Romawia hnena Memorandum thehluh an tum chu MZP hruaitute hian rem an tih loh avangin hun eng emaw chen an innawr a, buaina chhuak lovin kawng zawhtute hi an tin darh ta a ni. Hemi hnua thuchhuah an siamah Chakma tlawmngai pawl inzawmkhawm chuan National Eligibility Entrance Test (NEET) kaltlanga MBSS zir tura inziak tling Chakma zirlai 4-ten an zir theih loh nana MZP-in hma a la chu an hriat thiam loh thu an sawi a. Vawiina lungawi lohna an lantir dodal zawnga Aizawl leh Lunglei atanga MZP hruaituten hma an la chu tha lo an tih thu leh Chawngte SDO (Civil) kaltlanga Higher & Technical Education Minister Pu R. Romawia hnena Memorandum thehluh an tum MZP hruaituten tih luihna-in an chhuhsak nia sawiin hei hi an dikna leh chanvo rahbeh sakna-ah an ngaih thu an sawi bawk a ni. Puan tawh angin Mizoram Quota-a MBBS leh BDS zir tur thlannaa Category-I hnuaia Chakma zirlai telh an ni chu duh lovin MZP chuan Chaltlanga Higher and Technical Education Department, Technical Wing-in MBBS leh BDS zir turte tana Counselling a buatsaih chu an lo dang tawh a. Zirlaite nawrna avang hian Higher & Technical Education Minister Pu R. Romawia chuan ‘The Mizoram (Selection for Higher Technical Courses) Rules, 2016 chu hman theih lovin Court in stay mah se, kumina Mizoram Quota-a Technical Course zir tur thlanna-ah Category-I chu ram neitu, Zofate tan chauh dah a nih tur thu a lo sawi tawh a ni.