He thil thlen hun hi vawiin chhun dar 12 vel kha a ni a, kum 35 mi, Hmangaihsanga Bulfekzawl khaw miin a khalh maxi cab in a sut hlum hi kum 55 mi Pu C Khawllianthanga Mualkawi khua a ni a, ka pawh chhawn lovin a thi nghal a ni.
Champhaia Zonet corr. sawi danin maxi cab khalhtu Hmangaihsanga hian zu a rui hle nia sawi a ni a, Champhai leh New Champhai inkar kawng siam mektu Tarmat Company hnuaia hnathawk hnam dang mi 2 a sut hnuah ding duh lovin a tlan tlang a, Zotlang dawr kawna Taxi pakhat a sut hnuah Pu Khawllianthanga nilum ai lai chu a hnawl zui leh a ni.
Pu C Khawlianthanga hi ka pawh chhawn lovin a thi nghal a, Maxi Cab in a sut, dawr chhunga lo awm Pu C Laikunga leh a nupui Lalvangi Champhai Zote te pawh an hliam a, Pu C Laikunga zawk hi enkawlna \ha zawk dawng turin Aizawl lamah thawn nghal a ni.
Pu C Khawllianthanga a sut hlum hmaa he maxi cab in a sut hmasak, Tarmat Company-a thawk hliam tuarte hi Med Aim Hospital-ah dah luh an ni a, pakhat zawk chu a dinhmun a \ha vak lo a ni.
Maxi cab hi a khalhtu Hmangaihsanga ta a ni a, Champhai Police-ten an man hnuah Mipui thinrim pungkhawmin lirthei hi an nawr sawn a, chetsualna a tlenna hmun atanga Metre 150 vela hla Champhai leilet zawlah an hal a ni. Mualkawi thalai thinrimte chu pawikhawihtu hi hmuh tumin Champhai Police Station tualah an pungkhawm a, khawtlang hruaitu leh Police hotute inkawmin thil duhawm lo erawh a thleng zui lo.
Nunna chan ta Pu C.Khawllianthanga hi Mualkawi Presbyterian Kohhran Tual upa a ni a, a nupui leh a fate 4 a kalsan a, a ruang hi Champhai District Hospital-ah Postmortem nghal a ni a, zaninah tlaivarpuiin, naktukah Mualkawi thlanmualah vuiliam a ni ang.
Zotlang khawtlang hruaitute chuan he chetsualna thleng hi an dem thu sawiin Zotlanga lirthei chetsualna avang a nunna chante hi kawngsira thleng vek an nih thu an sawi a. Tunhnai lawkah pawh lirthei khalhtute hnenah fimkhur tak leh rui chunga lirthei khalh lo turin ngenna an lo siam tawh tih sawiin tun hnuah lirthei khalhtute fimkhur leh zual turin an ngen a, fimkhur loh vang leh rui chunga lirthei khalh avanga chetsualna a thleng leh a nih chuan na taka chet zel an tum thu an sawi.
