Champhaia Covid 19 hri kai enkawl dam mi 3 chu vawiin khan Dedicated Covid Health Centre atanga chhuah tir an ni a, heng mite nena Mizorama Covid 19 hri kai enkawl dam chu mi 130 an tling tawh.

0
14
views

Champhai District mi 3 Covid 19 hri kai enkawl dam, damdawi in atanga chhuah tirte hi mipa vek an ni a, chawhnu dar 1:45 khan Champhai Dedicated Covid Health Centre Recovery Ward atanga chhuah tir an ni. Nimin khan ZMC Covid 19 Testing Laboratory-ah sample 115 endik zingah hri kai hmuh thar an awm lova, Mizorama hri kai hmuh tawh zawng zawng chu 164 a ni a, mi 130 enkawl dam an ni tawh a.

Hnahthial District chu hri kai la awm lohna District a ni chhunzawm zel a. Lawngtlai-a hri kai 8, Saitual-a 3, Kolasib-a 11 leh serchhip District-a 3 te chu enkawl dam vek an ni tawh a.

Vawiin khan Lunglei Civil hospital-ah truenat khawl hmangin sample 7 test a ni a, positive 2 hmuhchhuah a ni. positive hmuhchhuah tharte hi BSF sipai, Lungleia awm Kerela atanga lo kir kum 50 leh 53 mi, symptoms nei, quarantine lai ve ve an ni.

Mamit Dist-a hri kai 20 zinga 10 enkawl dam an ni tawh a, enkawl lai 10 an awm a, an zinga 4 chu hri lakah an fihlim thei dawn nia ngaih a ni. Aizawl District-a hri kai hmuh tawh 39 zinga 32 dam tawhin, mi 7 enkawl mek an ni a, Siaha-a hri kai 18 zinga 8 an dam tawh a, enkawl lai 10 an awm a. Champhai-ah hri kai 10 zinga 8 dam tawhin, mi 2 enkawl mek an ni a. Khawzawl-ah pawh hri kai 3 zinga 1 a dam tawh a, enkawl lai mi 2 an la awm a ni.

Vawiin khan ZMC Covid 19 laboratory-ah sample 250 chuang endik a ni a, zaninah result hriat theih beisei a ni a. Vawiina Sample endik-te hi ZMC, Aizawl, Lawngtlai, Siaha leh Mamit District atanga dawnte a ni. Tun dinhmunah ZMC bikah Covid 19 kai mi 7 enkawl mek an ni a, heng mite hi Aizawl District mi vek, Mipa 1 leh Hmeichhia 6, kum 3 atanga kum 55 inkar an ni a, harsatna nei an awm lo a ni.