Chennai tanga rel hmanga bairabi lo thleng, laboratory-a an sample test lova quarantine chhuahsan tawh mi 884 te chu RAT hmanga endik nawn leh tum an ni.

0
134
views

Tamil Nadu leh Pondicherry-a awm mizo tangkhangte hian May ni 15 khan Bairabi Rel Station an lo thleng a, Mizoramin Coronavirus kai a hlawma a hmuh chhuah tan khan ni 14 an awm tlin tawh avangin inkhung hranna hmun quarantince centre chhuahsan vek tawh tura ngaih an ni.

Vawiina Health Dept thuchhuahah tarlan danin heng mi, RT-PCR a test loh te endik nan Rapid Anti-body Test, RAT hi hman tum a ni a.

Health Dept thuchhuah tarlan danin miin coronavirus a lo kaiin, a kai atanga ni 7 hnu-ah a taksaah antibody insiam tura ngaih a ni a, RAT hmanga endiknaah an reactive a nih chuan a finfiah nan RT-PCR hmanga test leh thin an ni a, mihring taksaah virus a luhna a la rei loh a, antibody a la insiam loh chuan RAT hian awmzia teh chiam a neih loh avangin RAT hmanga negative te pawh RT-PCR ah an positive ta hlawm nual a ni an ti.

RAT hi a hmantlak loh hulhual tihna a ni lo tih Health Dept hian an sawi a, a vei tantirte hmuh chhuahna atan tangkaina a ngah lo tihna mai a ni a. RT-PCR khawl hmanga a tam thei ang ber test tur a nih hnuah pawh RAT hi a tlangpuia enfiahna, surveillance atan hman zui zel tur a ni an ti a. Hri leng dona-a thawktute enfiah nan pawh hman chhunzawm tur a ni an ti.