Chhandamna Sipai Pawl Officers tura training zo ‘Messanger of The Gospel Session’ te hun puma rawngbawl turin nemnghet

0
444
views

Chhandamna Sipai Pawl Officers tura training zo ‘Messanger of The Gospel Session’ te chu nimin, Pathianni khan Territorial Commander Commr. Lalzamlova’n hun puma rawngbawl turin a nemghet a, Lieutenant nihna a pe nghal. Officers nemnghehna inkhawm Aizawl Temple Corps a buatsaih hi Chief Secretary, Lieut. Colonel John Kumar Dasari-a’n a kaihruai a, an fate Officer atana petute hnena pek \hin, Order Of The Silver Star chu heng Officer atana nemngheh takte nu leh pate hnenah pek a ni a, Territorial Staff Songster leh Staff Band ten Pathian fakna hla an rem a, zan lama Chhandamna inkhawmah an awmna tur puan a ni bawk. Chhandamna Sipai Pawl Officers atana nemngheh tak te hi an vaiin 27 an ni a, mipa 11 leh hmeichhia 16 an ni a, an zingah hian nupa tuak 2 an awm a ni. Chhandamna Sipai Pawl Officer training zo ta te hi kum 2016 August thla khan lakluh an ni a, kum 2 chhung training an beih hnuah nimin khan nemngheh an ni ta a ni. Nimina nemngheh an nih hma hian Bachelor of Theology (Bth) Degree leh an zirlaia ti \ha te hnena Merit Award hrang hrang pek a ni bawk.