Chief Minister hlui, MPCC President, Pu Lal Thanhawla’n Mizorama Medical College hmasa ber, MIMER chu Central lam hotute nen inbe rawn chunga ngaihtuahna thui tak neia din a ni tih sawiin, tih danglam mai mai chi a ni lo tih vawiina Congress Bhavan-a inkhawmah a sawi a. Tuna sorkar tharin tih danglam a tum anga kalpui a nih chuan a thlen tur ang a thlen loh palh a hlauh thu a sawi.

Pu Lal Thanhawla chuan, khawvelah mahni thil tuma hlawhchham lailet der leh mahni dote hnena inpe chawimawi an awm ngai lo nia sawiin, hetiang mi hi Mizorama chawimawi an nih chhung chu mipuite an buai dawn nia a lan thu a sawi a. MNF chu Central lama an hotutr BJP tih dan entawna hming thlaka buaiah puhin, sorkar laipuia BJP a sorkar tirh pawh khan Mosolman hming pu reng reng thlak tumin an hmanhlel a, hei hi mipui lamin an remtih loh avangin an tihlawhtling thei ta lo nia sawiin, hetiang bawk hian MNF sorkar pawh hmingthlak buaiin an buai a ni, a ti.

Pu Lal Thanhawla chuan Congress kaihhruai sorkar \um 5 a awm chhungin MNF-te chuan an mahni tihbuai nan thubuai an thehluh hnan ziah nia sawiin, hetianga an mahni bei rengtute chu thlah thlam lova an beih let ve tur thu a sawi bawk.

He inkhawm hi MPCC General Secretary, Pu LH Chhuanawma’n a kaihruai a, Finance Minister hlui Pu Lalsawta leh MYC Chairman hlui, Pu Joseph Lalhimpuia pawhin thu an sawi a ni.