Prime Minister Narendra Modi-a’n vawiina state thenkhat Chief Minister te Video Conference hmanga a kawmnaah Pu Zoramthanga hian ramri venhim hna hahthlak tak chu theihtawp chhuahin Paramilitary Force te bakah tualchhung volunteer ten theihtawp chhuahin an thawk tih an sawi.
Hri leng donaah sum leh pai leh hmanrua-a puih Mizoramin a mamawh tih Pu Zoramthanga hian Prime Minister hi a hrilh a, Mizoram chu lo neih leh a kaihhnawiha innghat anih avangin hemi kawngah hian tan lak a ngai a ni a ti a, mipui hriselna leh ei leh bar, eizawnna thlenga nasa taka hrilengin a nghawng dan hre rengin, chumi mil tura Disaster Relief Fund hman dan her rem nise tih a rawt a ni.
Pu Zoramthanga hian hri leng dona turin mipui, Kohhran leh pawl hrang hrangin sum an thawhkhawm tih a sawi a, tlawmngai pawlte leh mipuite chu hlawh beisei lovin mipui himna turin an duty a, in neituten dawr leh in luah man te an awl bawk a, Zoram mipuite inthurualna leh thawh hona chu state dangte tan pawh a entawntlak a ni a ti.
Pu Zoramthanga hian hripui do tura sorkar laipui atanga kawng hrang hranga puihna Mizoramin a dawn avangin lawmthu a sawi a, PPE, Test kit leh Medical Supply dangte leh sum leh paia puihna Mizoramin a dawn avangin lawmthu a sawi a, mi harsa zawkten ei tur an tlakchham loh nan thla thum chhung a thlawna buhfai pek an nih avangte leh ni za inhlawhna sum sorkar laipuiin a pek vang te in lawmthu a sawi a ni.
Video Conference-a inkawmnaah hian Chief Minister hi Home Minister Pu Lalchamliana leh Health Minister Dr. R. Lalthangliana te bakah Chief Secretary Pu Lalnunmawia Chuaungo leh sorkar mipawimawh dangten an tawiawm a ni.
