Congress legislature party leader, Pu Zodintluanga’n Covid-19 dona atan sum thawh a tul anih chuan CM, Minister leh MLA-te hi kan che hmasa tur a ni a ti.

0
130
views

Mizoram sorkar hnathawk, Group A, B leh C ten an hlawh basic pay atanga zaa 10 leh Group D-ten zaa 5 zel, thla 8 chhung sorkar sum bawma thawh an tum chungchangah Pu Zodintluanga hian sorkar hnathawkte inhuamna chu congress legislature party chuan ropui a ti a ni a ti a. Mizoram sorkar chu sum leh paiah a harsa tak tak a nih a, tanpui a ngai a nih chuan Minister leh MLA rualte chu a che hmasa ber tur, hlawh atanga pawisa thawh hmasa ber turah an inngai tih a sawi.

Pu Zodintluanga hian 2019-2020 budget-ah khan SEDP-ah ringawt pawh cheng vbc 188 nuai 37 zet hman loh a la awm a ni a ti a, Central sorkar leh NEC atangin cheng vaibelchhe engemawzat Mizoram sorkarin a dawng reng bawk a. COVID-19 do nana Mizoram budget hman nia sorkarin a sawi pawh kum 2020-2021 budget pumpui cheng vbch. 10,715 atang chuan tlemte a la ni a ti a. Mizoram sorkar chuan a duh phawt chuan project thenkhat atana pawisa a dah tawhte pawh COVID-19 do nan hian a hmang thei a, sorkar hnathawk hlawh tibuai rih lo hian Mizoram sorkar sum bawmpui atangin ruahmanna a la siam thei a ni tih chu Congress Legislature Party ngaihdan a ni a ti.

Chief Minister Pu Zoramthanga’n awihawm loh khawpa sum tam tham tak Mizoram sorkar-ah a luh tur thu te, a then phei chu rin loh lam atanga sawichhuah ngam loh khawpa tam a lo luh tur thute a lo sawi tawh niin Pu Zodintluanga hian a sawi a. Chanchinbu mite hmaah pawh COVID-19 dona atan pawisa limit a awm loh tur thu a lo sawi tawh bawk a ni a ti a. Hetiang a nih laia sorkar hnathawk zawng zawng, COVID-19 dona kawnga a hmatawnga awm Health Department leh Home Department a thawk zawng zawngte huama sorkar tanpuina tur chhun luh a ngai ta chu a pawi hle a ni a ti.

Mizoram sorkar chu sum leh paiah a harsa tak tak a nih chuan Chief Minister, Finance Minister ni bawk hian a sawichhuak mai turaah an ngai tih Pu Zodintluanga hian a sawi a. A tul a nih chuan Special Assembly Session-te pawh kovin, budget-te pawh her rem theih a ni a ti a. State sorkarin COVID-19 avanga harsatna a tawk tak tak a nih chuan Chief Minister, Minister leh MLA-te chu an che hmasa tur a ni a, a tul a nih chuan kan hlawh cut bakah MLA fund thleng pawhin sorkarah an pe mai turah an in ngai tih a sawi.