Khawvela mi 5000 chuangin an thihpui tawh Coronavirus/Covid 19 do turin ram pum huapa tanrual a ngaihzia hriain politics inbeihna atana hman an duh lo tih Congress party hian an sawi a, hetihrual hian sorkar hmalak dan chu an duh khawp lo hle tih an sawi. Congress Party hian atir lama Vairengte a endikna hmun pakhat chauh siam vanga mipui zin veivakten harsatna nasa tak an tawk kha sorkar ruahmanna fel tawk loh zia lantirtu a ni an ti a, Zirtawpni kalta a\anga sorkarin endikna hmun a siam belh dan pawh a fel lo hle nia sawiin, endikna hmun siam belhah te hian Thingdawl Nursing School-a Nurse zirlai engemawzat an duty tir a nih bakah nurse zirlaite ho tur hian Dentist doctor pakhat leh Ayush doctor pakhat chauh dah an ni an ti a,. mipui an chiai tawh hnu leh, programme pawimawh tak tak thulh a nih mek laia Mizoram kawtchhuah bera Dentist leh Ayush doctor ho a Nurse zirlai duty tir an ni chu sorkar inthlahdah zia lanna ni a an hriat thu an sawi a. Sorkar chu Vairengte-a hmanraw tha zawk, Medicine doctor leh nurse puitling, zirlai rual ni lo a rang thei ang bera dah turin an phut tih an sawi.
Health Department-in helpline number an daha rinhlelh report an pek, official-ten an lo chhan dan zahpuiawm tak social media lama darh pawh pawi an tih thu Congress party hian an sawi a, Health dept chu rang taka an insiamthat nghal an duh tih an sawi a. India hmarchhaka state tam zawkin Covid 19 enfiahna khawl an neih vek tawh laia Mizoram sorkarin tun thlenga a la nei ve thei lo pawh mak an tih thu leh Mizoram sorkar chu he thil ngaihven har lutuk deuh nia an hriat thu an sawi.
Myanmar nena inrina international border kharna hmun thenkhat, a bikin Siaha District-ah te Mizoram Police-te duty loa civil mi, Mara Thalai Pawl, Mara Thyatli Py te duty tir an ni pawh mak an tih thu Congress Party hian an sawi a. Myanmar lam nen intithiam loa insual buaina hial a thlen phah nia sawiin, sorkarin a tih tur a tih loh vangah an ngai tih an sawi.
Congress Party hian he hri leng mek dang tura Mizoram sorkar hmalaknate a \hat tawk phawt chuan theih tawp chhuaha thlawp an inhuam reng tih an sawi a, nawr kal chawp reng a ngai dawn a nih erawh chuan mipui him nan theihtawp chhuaha sorkar nawr turin an inring reng tih an sawi.
