Congress party-in sum harsatna chhuanlama Sorkar hnathawkte hlawh bat thensak a nih mek laiin rorellai MNF party mite hnenah cheng vbch. tam tak hu Contract pek reng a ni an ti a, hriatthiam har an tih thu an sawi.

0
12
views

Vawiina Aizawl Press Club-a thuthar lakhawmtute an kawmnaah MPCC Media Chairman, Congress Party thupuangtu Dr. Lallianchhunga chuan, hri leng mek vanga Mizoram Sorkar-in a hnuaia thawkte hlawh thla 3 chhung bat thensak tura ruahmanna a siam chu June thla hlawh atang hman tan a ni a, Sorkar hnathawh hlawh bat thensak atang hian thla tin sorkar-in cheng vbch. 30 a hum thei dawn a, thla thum chhunga sum an hum tur chu cheng vbch. 90 a ni a ti a, hetiang a nih mek lai hian Department hrang hangah Party mite tan Contract pek reng a ni thung tih a sawi.

Congress party thupuangtu hian RTI hmanga an zawhna Sorkar-in a chhan danin, Sports Council hnuaiah ringawt pawh Inkharkhip chhung May atanga June ni 23 thleng khan Contract 7, cheng vbhc. 8 leh nuai 25 man pek chhuah a ni a ti a, heng hnate hi hmanhmawh taka thawh ngai a nih loh laiin, a thawktu tur ruahman sa, Restricted Tender hmanga pek an ni, a ti a. Sum harsatna chhuanlama Sorkar hnathawkte hlawh bat thensak an nih mek laia Fair lo taka hna inpek chu Congress Party chuan a hrethiam lo hle a ni, a ti.

MPCC thupuangtu hian, Mizoram Sorkar-in vawiin thlengin Sorkar laipui atanga sum a dawn tur ang ang chu a dawng reng niin a sawi a, State Sorkar atanga Tax leh Non Tax atanga sum lakluh reng a ni a. Covid 19 hri leng dona tur bik phei chu cheng vbch. 55 leh nuai 77 zet hmuh a ni a ti.

Hetiang a nih mek lai hian Quarantine Centre a ruak zel a, State pawn atanga lo haw tur an awm tawh mang lo a, ZMC pawhin buaipui tham damlo leh Swap Sample endik tur an nei tawh lo tih Health Minister-in a sawi tawh avangin Covid 19 vanga sum senso tur hi tam tak a ni thei tawh lo tih Congresss thupuangtu hian a sawi a, Sorkar hnathawkte hlawh bat sak chu tulna awm tawh lo nia a lan avangin thla 3 chhunga hlawh bat tur cheng vbch. 90 chu eng atana hman nge an tum tih puangzar turin Sorkar an phut tih a sawi a, kumin maiah AMC, Local Council leh Village Council inthlan hmachhawn a nih dawn avangin, he sum hi Party mite uaibeh nana Contract inpekna tur a nih chuan a rang thei ang bera pe let leh nghal turin Sorkar an phut tih a sawi.