MNF President, Pu Zoramthanga chuan mipui atanga Congress sorkar sawiselna leh duhkhawp lohna awm an party tih tir ni lovin a sawi. Vawiina Mizo Hnam Runa an party chhung inkhawmah he thu hi sawiin, Pu Zoramthanga chuan an party-in Congress chu zu zuar rawh u an tih loh thu te, kawngpui chhia pawh an tihchhiattir a nih loh thu te sawiin, harsatna hrang hrang thlengte chu anmahni Congress thlen tir vek ni zawkin a sawi a, Chief Minister, Pu Lal Thanhawla’n Kohhran sawisel zawnga thu a sawi pawhin Kohhran hruaituten thu takah an ngaihsak tawh lo nia ngaih theih turin tunah chuan thil a awm hial tawh niin a sawi a ni. Pu Zoramthanga chuan, Mizo te hmel a danglam avanga ram chhung leh pawna harsatna an tawh thin chu thuneihna an chan hunah sutkian an tum dawn thu a sawi bawk. He Inkhawm hi an party General Secretary, Pu Lalthanliana’n a kaihruai a ni.
