Hemi chungchanga thuchhuah an siamah, Citizenship Amendment Bill, 2016 duhlohna India ram hmun hrang hrangah lantir a, Hmar chhak State thenawm ten na taka an duh lohna an lantir laiin leh NDA sorkar na taka an kar laiin, Mizoram sorkarin dodalna awmze nei leh ngaihpawimawh tham thawm a la nei lo tih an sawi a, Sorkar laipuia tlaktlum loh hlauh vanga ram leh hnam chhan nana ke pen ngam lovah Mizoram sorkar chu an puh a ni.
MPYCC thuchhuah chuan Pu Lal Thanhawla kaihhruai Congress sorkar-in 2018 June ni 28 leh 29-a Assembly Session-ah CAB, 2016 duhlohna Resolution hi a lo pass tawh tih sawiin, na taka do zel an tum tih an sawi a. Lok Sabha MP, Pu C.L.Ruala leh Rajya Sabha MP Pu Ronald Sapa te pawhin an theihtawp chhuahin an duh lohna an lantir a ni, an ti bawk.
