Congressional Committee hmaah Donald Trump Junior insawifiah dawn- Democrat Senator

US President Donald Trump-a fapa upa ber, Donald Trump Junior-a chu nikuma US President thlannaah Russia a inrawlh nia sawi chungchang chhuitu, Congressional Committee hmaah a insawifiah dawn niin Democrat Senator, Dianne Feinstein-i’n a sawi a, CNN hnenah he thu hi sawiin, President fapa hi tun thla tawp lam emaw, thla leh lamah emaw insawifiah tura koh a nih a rin thu a sawi a, hemi chungchanga President Trump-a thisen zawmpui, mipui hriata a insawifiah vawi khatna a ni ang. Nikum inthlanpuiah khan Russia a inrawlh nia sawi chungchang chhui chiannaah hian tun thla ni 7 khan Trump Jr. hi Senate Judiciary Committee chuan thu zawhfiah atan a lo ko tawh a, President Trump-a makpa, Jared Kushner-a pawh July thla khan insawifiah tura koh a ni bawk a, mahse hei hi America mipui hriata tih a nih loh avangin US roreltute chuan mipui hriata insawifiah turin an duh nia sawi a ni a, Kushner leh Trump Jr. hian Russia nena a ruka thawk duna puh an nihna chu an hnawl ve ve nia hriat a ni. Hemi chungchang chhuitute chuan nikum June thlaa New York-a President Trump-a in chhawng sang, Trump Tower-a Trump Jr.-a leh Russia ukil pakhat, Natalia Veselnitskaya-i inkawmna chu an chhui uluk hle nia hriat a ni a, Natalia-i hi Russia sorkar ukil, eptu pawl candidate, Hillary Clinton-i tihhmingchhiatna tur thuruk neia sawi a ni a, Trump Jr. erawh chuan an inkawmnaah khan chutiang lam thil engmah an sawi lo niin a sawi.