Coronavirus kai Mizorama hmuh chhuah tharte zingah vantlanga kai darh thei tura ngaih an awm avangin, Thenzawl, Siaha Siahatla veng leh Lunglei Rahsi vengah te mipui pawn chhuah khap a ni.

0
20
views

Inrinni-a coronavirus kai hmuh chhuah mi pahnih te chu Guwahati atanga Lawngtlai an panna lamah, Thenzawla thingpui dawr leh dawr te pakhatah an chawl a, Thenzawl Town Level Taks Force hotuten thutkhawm hman hmawh kovin nizan atang khan Thenzawl khaw pumah mipui pawn chhuah khap nghal a ni.

Sorkarin state pawn atanga mahni lirthei hmanga haw turte phalna a pekah an zawm tur tarlan a ni a, Lirthei khalhtu leh passenger te kawng lakah khawi khuaah mah an din phal a ni lo a, midang an hnaih phal a ni lo bawk.

Thenzawla Zonet reporter PC Lalremsanga sawi danin, heng mi pahnih te hian sorkar in Dan a siam an bawhchhiat avang leh Thenzawl mipui thlabara an siam avangin an phu tawk hremna tuar tura thubuai siamsak an nih theih nan Thenzawl Task Force chuan hmalak an tum a ni.

Lawngtlai District atanga coronavirus kai hmuh chhuah thar mi pali te zinga pahnih, Thenzawla chawl khawmuangte hian June ni 28 khan Guawahati atangin Mizoram an rawn lut a, hemi zan hian Aizawl mualpuia Rajiv Ghandi Stadium-ah an riak a, a tuk ni 29 khan Bike leh Scooter hmangin Lawngtlai an pan a, an haw kawngah hian Thenzawl-a Restaurant pakhata an chawlh bakah a kawta dawr-ah thil an lei a, a piah lawka petrol pump-ah petrol an thun bawk a ni.

An chawlhna Restaurant neitute leh thawktute, Petrol pump-a hnathawk te bakah a bula dawr neitu, an vaiin mi 14 te swab sample chu nizan khan Thenzawl CHC a Sample Management Team ten an laksak a, tukin zing khan ZMC-ah endik turin an thawn nghal a ni.

Thil thleng chungchang ngaihtuah hian vawiin khan Serchhip Bawrhsap Pu Kumar Abishek hovin Thenzawl Task Force hruaitu te chu Serchhip-ah an thukhawm nghal a, Thenzawl Town Task Force hruaitute chuan fimkhur loh avang leh dan zawm loh vanga Thenzawl mipuite thlabara siamtute chungah chuan sawrkar in action la ngei se an duh tih an sawi.

Serchhip bawrhsap, District Disaster Management Authority Chairman chuan, Thenzawlah mipui nawlpuia hri leng inkaidarh a thlen lohna turin kar leh Thawhtanni, July ni 13 thleng mipui pawn chhuah khapna thupek vawiin khan a ti chhuak nghal a. Mipuite chu ke leh lirthei hmanga pawn chhuah phal a ni lova, dawr zawng zawng pawh khar vek tur a ni a, Thenzawl paltlang tur lirthei te chu chawl khawmuang lova tlan tlang tur a ni.

Hetihlai hian Mizoram sawrkar thuchhuak angin sorkar pisa erawh hawn a ni ang a, Inkharkhip pumhlum hian dan leh thupek kengkawh tute, Health, Police, Fire & Emergency Service, sorkar hotute, VLTF duty, Media, bawnghnute sem, leh SDO(C) atanga phalna nei te a huam lovang.