Covid-19 dona kawnga Mizoram sum dinhmun sawi chiang tura nawrna nasa tak karah Finance changtu Chief Minister Pu Zoramthanga’n Covid-19 hrileng vangin India ram sum dinhmun emaw, Mizoram sum dinhmun dik tak emaw tuman an sawi thei lo tih a sawi.

0
19
views

Mipuite hnena thuchah a sawiah Chief Minister hian sum dinhmun chu hrileng tan hma chuan a sawi lawk theih a, tunah erawh chuan sum lakluh tur zat a hriat theih loh avangin rinthu bak a sawi theih loh a, Pathian chauh lo chuan a hre lo a ni a ti.

Chief Minister hian Mizoram sum hmuh thin zaa 90 zet chu central atanga hmuh thin a ni tih a sawi a, a che ber dawnin, India ramin harsatna lian a su dawn a, Mizoram pawhin harsana lian a nei dawn tih a hriat a, a chhe ber a lo thlen pawha harsatna tawk lutuk lo tura theihtawpa lo inbuatsaih lawk a ngai a ni a ti. Chief Minister hian 2020-21 budget pass laiin Covid-19 a la leng lo a, khatih hunlai khan pawisa pawh a harsa lo a, hri a len hnuah chhiah lakna te a chawlh tak thup avangin sum hmuh tur a hriat lawk lova, fimkhur takin kan kal ta vek a ni a ti.

Chief Minister Pu Zoramthanga hian sorkarin PPE a lei zinga a tha tawk lo awm chungchang pawh a sawi lang a. Innbuatsaih lawkna awm hman lo anih avangin India sorkar pawhin ramdang ami a dap a, a lo thleng hlim State ten an in chuh a, boruak a fim deuh hnuah chuan fim zawka ngaihtuah theih a ni ta a. A tira mi kha indem nana hman loh a tha a ni a ti.

NEC atanga cheng vbc 3 Mizoram sorkarin a dawn, hman loha awm chungchangah he sum hi NEC-a Mizoram sorkar chanpual sa, Covid-19 kaihhnawiha hman phalna pek a ni a ti a, sanction a nih atanga thla khat chhungin hman theih ngaihna a awm lo a ni a ti.

Pu Zoramthanga hian covid vang liauin supply dept in cheng vbc 24 nuai 56 sing 2 sang 7 a hman belh tawh tih a sawi a. Health dept. in cheng vbc 19 nuai 57 chuang a hmang tawh a, SDRF atangin cheng vbc 7 hman a ni tawh a, LESDE pawisa pawh free ration leh hnathawktu inziaklutte tanpuina atan cheng vbc 21 nuai 26 hman a ni tawh tih a sawi a. Covid-19 dona atana sum hman cheng vbc 50 atanga 70 vel chu Mizoram chanpual, Mizoram sorkar pawisa ni sa, India sorkarin Covid-19 dona atan a hman theih, an rawn tihte a ni a ti.