Cyclone na chi, Typhoon Mangkhut chuan Philippines ram a nuai hnuah, Pathianni khan China Guangdong a thleng ta.

0
423
views

 

Typhoon Mangkhut hian ruah a pai hnem vangin Philippines-ah chuan lei a min nasa hle a, thuneitute chuan thi 50 chuang an awm tawh thu leh a tam zawk chu leimina thi an nih thu an sawi a, Philippines President Advisor Francis Tolentino chuan sorkar chhinchhiah dan chuan thi 33 leh chin hriat loh mi 56 an awm mek tih a sawi a, chhanchhuah hna thawk turin sipaite tirhchhuah an nih tawh thu a sawi bawk a, hemi hnu lawk hian sipai hotu, Emmanuel Salamat chuan Benguet-a leiminah mi 19 vel an thih belh leh niin a sawi ve leh bawk a ni.

China thuneitute chuan Typhoon Mangkhut hi thli darkar khatah km 160 vela chakin a tleh mek niin an sawi a, Guangdong leh Shenzen ah chuan hnathawhna hmun khar a nih thu leh chhiatna lian tham a thlen thulh pawha an buai loh nan kawlphetha pawh ren takin an pe chhuak rih tih an sawi bawk a, mi nuai 2.45 vel hmun him zawka sawn chhuah an nih tawh thu leh sangha manna lawng 48,000 vel chawlhtir a nih tawh bakah, hnathawhna hmun dang, 29,000 vel khar a nih thu an sawi bawk a ni. Guangdong hi China-a mipui cheng an tam berna bial a ni a, mi nuai 100 chuang an awm a ni.