Dr. BD Chakma-a’n CM hnenah banna thehlut

0
817
views

Minister of State, Dr. BD Chakma-a’n vawiin khan CM, Pu Lal Thanhawla hnenah Council of Ministers atanga a bànna a thehlut a. Vawiin chawhma khan CM hi a pisa-ah hmuin a banna hi a thehlut a ni. CM hnena lehkha a thehluhah Dr. BD Chakma chuan, National Eligibility cum Entrance Test (NEET), 2017 hmanga Mizoram Quota-a MBBS leh BDS zir tura thlante chu kumin July ni 20 khan Higher and Technical Education Department, Technical Wing-in Counselling a pe tih sawiin, hemi ni vek hian Counselling neih tawh sa chu chhan awm lova sut a ni a, H&TE Secretary chuan, Counselling hi a thara neih leh a nih tur thu a sawi bawk a. Hemi hnu, July ni 26 khan H&TE Minister, Pu R. Romawia’n thuchhuah siamin, Mizoram Quota-a MBBS leh BDS zir turin Zohnahthlakte chauh thlan an nih tur thu a sawi leh a. Minister thusawi atang hian Mizoram Quota-a MBBS leh BDS zir tur hian Zohnahthlak lo chu thlan ve a nih loh tur thu chiang takin a hriat theih a, hetiang a nih chuan NEET hmanga MBBS leh BDS zir tura tling, Chakma zirlai 4 chuan an zir ve thei dawn lo tihna a ni a, hemi chungchanga sorkar thutlukna hi a tan pawm theih a ni lo tih sawiin, Dr. BD Chakma chuan, mipui aiawha rorel tura thlan a nih angin hnam, chi leh sakhaw hrangte tana inang tlanga rorelsak tur a nih laia chi leh sakhaw inthliarna rawng kai zawnga thil tih a ni chu tha lo a tih thu leh, hemi atana a theih ang anga hma a lo lak ve tawhna-in mi dang pawi a sawi a nih chuan ngaihdam a dil nghal tih a sawi. Dr. BD Chakma chuan, Minister of State a nihna atanga a banna hi a chhia leh tha hriatna thiang tak hmanga a thehluh a ni tih sawiin, pawmsak turin CM chu a ngen a ni.

CM, Pu Lal Thanhawla chuan, Dr. BD Chakma-a banna hi pawm a nih dawn leh dawn loh a la sawi thei lo niin a sawi a. A banna hi ngaihtuah tur chauh a la nih thu a sawi. Puan tawh angin, NGO Coordination Committee chuan Dr. BD Chakma hi Minister of State a nihna atanga ban turin July ni 27 khan CM an lo ngen tawh a, an ngenna hi bawhzuina engmah a awm loh avangin tun thla ni 25, tun kar Zirtawpni thleng ngaihchan ni se, hemi hnuah hian a tul dan anga na zawka nawr ni se an ti a, kum 2014-a CADC huam chhung, Borapansuri-a MZP-in Zofate chawlhbuk sak a tum khan Dr. BD Chakma thil tih avang hian MZP Hqrs. Lunglei hruaitute chu chhan mumal awm lovin Mizoram Police-in an man a, Zofate chawlhbuk sak tum hi Chakma mipuiten an dodalna lantir nan Chakma NGO hrang hrangten Boranpansuri MDC Bye Election an boycott a, hemi chungchanga an inhmuh khawmnaah pawh khan Dr BD Chakma hi a huaihawttu ber niin NGO Coordination Committee chuan an sawi bawk a ni.