Eizawnna atana sial vulh chungchang inzirtirna, ni khat awh chu vawiin khan Aijal Club-ah buatsaih a ni a, CM, Pu Lal Thanhawla’n a hmanpui. He workshop hi Indian Council of Agricultural Research hnuaia National Research Centre on Mithun, Medziphema, Nagaland leh AH&Vety Department tangkawp buatsaih a ni a. CM chuan sial chu Mizo pi leh pute hun lai atanga sakhuana leh puithuna thila ran leklam, kut nikhuaa mipui hraina ran pawimawh tak a ni, a ti a, tunlai thiamna hmanga vulh leh a tangkaina tam tak hriat chian a ni ta chu lawmawm a tih thu a sawi a.
India ram boruak thlirin, sakhaw chi tinreng pawhin sa ei theiha an pawm tlan a nih bakah a hnute thlenga mi tin duh tlan a nih avangin sum thawh chhuahna kawngah a hlawk chho zel dawn niin a sawi. ICAR Director General, Dr. Trilochan Mohapatra pawhin Demonstration Centre pahnih kumin chhung ngeia ICAR-in a siam tur thu a sawi bawk. AH & Vety Dy. Director, Dr. Lalhmingthanga chuan cheng vbc. 39 chuang senna tur, Mithun Production & Development Project chu Thenzawl-ah siam a nih tur thu a sawi a ni.
