Gorakhpur damdawiina naupang 60 chuang thihna chungchangah doctor pakhat ban, state sorkar leh Allahabad High Court-in chhui chiang dawn

0
587
views

Uttar Pradesh, Gorakhpur-a Baba Raghav Das Medical College damdawi ina ni nga chhunga naupang 60 chuang an thih chungchanga buaina kal zelah, nimin khan he thil thlenga mawhphura puh, naupang doctor, Dr Kafeel Khan chu a hna atanga ban a ni a, hemi chungchangah hian Delhi-a AIIMS doctor-te chuan Dr Khan-a hi dik lo taka puh chhiat niin an ngai. AIIMS hnuaia pawl pakhat hotu, Dr Harjit Singh Bhatti-a chuan doctorte chu puh chhiat an ni thin nia sawiin, tunah pawh hian doctor-te ni loin, state sorkarin mawh a phur niin a sawi a, he thil thleng hi chhui chian an duh thu a sawi a ni. Nimin khan UP CM, Yogi Adityanath-a chuan a bial, Gorakhpur-a damdawi in hi tun thla ni 9 khan a tlawh thu leh oxygen an tlachham tih hi hriattir a nih loh thu a sawi a, puan tawh angin, naupang zinga a tam zawk hi chu oxygen pek tur tlakchham avanga thi nia sawi a ni a, he damdawi ina oxygen bur enkawl thinte chuan Ningani khan Chief Medical Officer hnenah oxygen a tlem tih hi an hriattir tawh niin an sawi a, Lucknow-a oxygen an leina thinte dap a nih hnuah, a hmaa oxygen an leina, cheng nuai 70 chuang an la pek loh avanga bur thar la pe lo nia hriat an ni a, hemi hnu hian Faizabad atangin he damdawi in hian oxygen bur 300 a lei tih hriat a ni bawk.

He damdawi ina thil thleng chungchangah hian Supreme Court chuan a inrawlh loh tur thu, vawiin khan a sawi a, Chief Justice J S Khehar leh Justice DY Chandrachud-a awmna bench chuan, hemi chungchang thlentu ukil chu Allahabad High Court pan zawk turin thurawn a pe a ni. He ukil hian Baba Raghav Das Medical College damdawi ina thil thleng hi Special Investigation Team chhuitir turin Supreme Court hi a ngen a, he thilah hian thubuai pawh ziah luh a la ni lo niin Police-ten an sawi. State sorkar chuan Inrinni khan he damdawi ina thil thleng chhui tur hian state Chief Secy. a ruat a, he Medical College Principal, Rajiv Mishra chu a hna atangin a chawlhtir bawk a ni.