Hauva & Sons, Zawlbuk Tuizem neitu, Pu Thantluanga, Kanan Veng-in coronavirus kai leh kai loh endikna khawl leina turin cheng nuai 21, Mizoram sorkar hnenah a pe.

0
803
views

Real Time Polymerase Chain Reaction (RT-PCR) leina tur sum hi vawiin chawhnu khan Health Minister Dr. R. Lalthangliana kutah Pu Thantluanga aiawhin a fapa Pu Zodinpuia’n a hlan a. Mizorama sumdawng liante zingah tam thama sorkar pui hmasa ber pawl an ni.

Health Minister Dr R Lalthangliana chuan hun khirh tak karah midangte tana malsawmna ni tura mimal an pen chhuak chu lawmawm a tih chu a sawi a, Pathianin a let tam taka mal a sawm a rin thu sawiin, khawl thar chu neih thuai beisei a ni a ti.

Health Secretary Pu Lalengmawia sawi danin ICMR atangin RT-PCR khawl hi Mizoramin a beisei mek bawk a, National Health Mission-a sum dawn atang pawhin ni 10 vel chhungin RT-PCR hi neih belh beisei a ni bawk. Vawiina khawl thar leina tur sum inhlannaah hiain Minister hi COVID-19 Medical Operational Team Chairman Dr. ZR Thiamsanga MLA in a tawiawm a ni.