Health Minister-in Intensified Mission Indradanush hawng

0
468
views

Sorkar laipui ruahmann anga nu nau pai leh naupang hri danna pek beihpui thlakna tur, Intensified Mission Indradanush chu vawiin khan Health Minister, Pu Lal Thanzara’n a hawng a. Ram puma hri danna pek beihpui thlak hi kum 2020-ah zawh tum ni mah se, sorkar laipuiin a ngaih pawimawh avangin kum 2018 December-ah nu nau pai leh naupang za a 90 talin hri danna an lak theih nan he beihpui hi thlak niin a sawi. Pu Lal Thanzara chuan, kuminah ruahtui a tlak tam avangin IMI bawhzuina tura District thlan chhuah – Lunglei, Lawngtlai leh Mamit District-a khaw \henkhat chu kal pawh harsa deuh dawn mah se, Health Department hnathawkte chu nu nau pai leh naupang a tam thei ang berin hri danna an lak theih nan theihtawp chhuah turin a ngen a ni. IMI hawnna inkhawm, Zarkawt-a Chief Minister Pisa tuala neih hi National Health Mission Director, Dr. Lalrozama’n a kaihruai a, State Extended Polio Immunization Officer, Dr. Lalzawmi’n District 3 – Lunglei, Lawngtlai leh Mamit District-a IMI bawhzui tum a nih dan a sawifiah a ni.

Puan tawh angin, naupang kum 2 hnuailam leh nu nau pai zawng zawngin hri danna an lak vek theihna tura beihpui, Intensified Mission Indradanush hi ram puma District 118 leh khawpui thlan chhuah 17-ah thlak tur a ni a, hmarchak bialah chuan District 52-ah bawhzui a ni ang a, Mizoramah chuan District 3 – Lawngtlai, Lunglei leh Mamit District-ah bawhzui a ni. Vawiina a hawnna inkhawmah hian Health Minister chuan naupang \henkhat, zeng hri danna a pe a ni.