Health Minsiter Dr R Lalthangliana hova Covid 19 dona kawnga hmalatute vawiina thukhawmin State pawn atanga lo haw zawng zawng Rapid Antibody Test hmanga endik bakah RT PCR Test hmanga endik dan tur an sawiho.

0
36
views

RT-PCR Test tih theihna Mizoramin a neih chhun Zoram Medical College, Falkawn-a Testing Laboratory viltu ZMC-a Microbiology department hotute chuan mimal tin sample endik vek sen a nih loh pawhin, mi hrang hrang sample lakkhawm, vawi khata a ruala endik-a, rinhlelhawm a lo awm anih chuan mimal tin sample endik nawn leh theuhna ang chi, pooled sample method tia sawi pawh kalpui theih a ni tih an sawi a. Ruahmanna an siam nghal a ni.

Sawrkar laipui thuchhuak anga karleh thawhtanni atanga domestic flight chhunzawm leh turah Lengpui Airport chu hawn phal zingah a tel dawn em tih hriat la ni lo mahse, thlawhtheihna hmanga tangkhang lo haw tur leh khualzin rawn haw turte Airport a lo dawnsawn dan tur pawh Health Minister ho hian ngaihtuah a ni a. Hnamdang thlawhtheihna a rawn kal tur an chuan an rawn chhuah hmain ILP an lak fel sa a ngai dawn a. Thlawhtheihna hmanga haw tur reng rengin Home department phalna an lak a ngai dawn a ni.

Mizorama inkhung hranna hmun Quarantine Centre awm thei zat leh mihring leng zatte pawh thutkhawmnaah hian an thlir ho a. Tangkhang Mizoram pawna rawn haw tur hnaivai zingah zanin hian Telengana state atangin mi 630 Hyderabad rail station atangin an rawn chhuak dawn a, May ni 24 ah Silchar an rawn thlen beisei a ni a, Bairabi thlenga an rawn kal theih dan tur dap mek a ni a. Kerala atangin mi 129 chu May ni 23 hian an lo chhuak dawn a, May ni 25 khian Karnataka-a tangkhang mi 1500 velin Bangalore rail station chhuahsanin May ni 28 ah Bairabi an rawn thlen beisei a ni a, May ni 22 hian Odisha a tangkhang mi 23 chu bus a rawn chhuakin May ni 25 ah vairengte an rawn thlen beisei a ni.