Hnahthial District chu hri kai awm lohna District a ni chhunzawm zel a. Saitual, Khawzawl leh Mamit District-a hri kai-te pawh enkawl dam vek an ni tawh.

0
11
views

Saitual leh Khawzawl District-ah hian hri kai 3 ve ve hmuh an ni tawh a, Mamit District-ah chuan hri kai 20 hmuh an ni tawh thung a, heng mite hi District Dedicated Covid Health Centre leh Covid Care Centre-a enkawl an nih hnuah dam vek tawhin, damdawi in atanga chhuah tir an ni tawh a ni. Siaha-a hri kai enkawl lai 14 zinga 8 chu an dam tawh avangin vawiin khan damdawi in atanga chhuah tir an ni a, heti hian enkawl lai mi 6 an la awm a. Siaha-ah hian hri kai hmuh tawh 23 zinga 17 an dam tawh a ni. Champhai-a hri kai enkawl lai 2 zinga pakhat pawh nimin khan damdawi in atanga chhuah tir a nih avangin hri kai enkawl lai pakhat chiah a awm tawh a, Champhai-ah hian hri kai 10 zinga 9 enkawl dam an ni tawh a. Serchhip-a hri kai 3 enkawl dam an nih hnuah hri kai thar 2 hmuh belh an nih avangin hri kai enkawl lai 2 an awm a. Kolasib District-a hri kai 11 pawh enkawl dam an nih hnuah hri kai 1 hmuh thar a nih avangin enkawl lai 1 a awm bawk. Covid 19 hri kai hmuh chhuah tamna ber Aizawl District-ah chuan hri kai 87 an awm tawh a, an zinga 38 enkawl dam tawh niin, enkawl mek 49 an awm a. ZMC-a Covid 19 hri kai enkawl mek zinga natna lanchhuah dan nei lo leh an hriselna dinhmun enfiahnaa Result tha mi 24 chu nimin khan Berawtlanga Covid Care Centre-ah sawn an ni. Lunglei District-a hri kai hmuh tawh 58 zinga 47 dam tawhin, enkawl mek mi 12 a awm a. Lawngtlai-a hri kai 12 hmuh tawh zinga 8 dam tawhin, mi 4 enkawl mek an ni a.

Vawiin khan Falkawn damdawi inah Covid 19 hri kai damlo 2 leh rinhleh 3 dah luh an ni a, tun dinhmunah ZMC-ah Covid 19 hri kai damlo enkawl mek chu mi 25 an ni a, chungte chu Mipa 23 leh Hmeichhia 2, kum
12 atanga 56 inkar, Aizawl District mi vek an ni a. ZMC-a damlo 3 ICU-a awm mek zinga pakhatin khawsik leh thawhah nasa vak lo a nei a, midang erawh ngaihtuah awm an ni lo a ni. Vawiin khan ZMC Covid 19 laboratory-ah ZMC, Aizawl, Champhai leh Khawzawl District atanga sample dawn 200 chuang endik leh a ni a, zaninah result hriat theih beisei a ni. Vawiin thlengin ZMC-ah Covid 19 damlo mi 104 enkawl an ni tawh a, mi 55 enkawl dam tawh niin, mi 24 chu Berawtlanga Covid Care Centre-ah sawn an ni.