Mizoram Police in kum 49 an tlinna, Raising Day vawiina an lawmnaah Pu Chama hian huaisenna kawngah leh misual hnu chhui kawngah Mizoram police te hnathawh dan chu sorkarin a chhuang hle tih a sawi a, uniform leh ralthuam thlengin Mizoram Police te chu hmanraw \haa thuam chak tum an ni a ti a, Union Home Minister Amit Shah-a thurawn bawhzuiin police te thuam chakna tur hian cheng vbc 410 senna tur ruahmanna sorkar laipuiah thlen a ni a, Union Home Minister chu a thutiama ding mi a nih chuan a hlawhtlin ngei a beiseiawm a ni a ti.
Police dept-a post ruak tam tak awm chungchangah post 650 a\anga 700 vel la tura sorkarah thlen a ni a ti a, district hawn thara thawk tur mi 200 vel lak phalna hmuhfel a ni tawh a, heng te nen hian a ruala lak tum a ni a ti.
Pu Chama hian tun hnaiah rikrum thila police te biak pawhna tur emergency response service siam a nih thu leh phone number 112 ah rang taka biak pawh theih an nih tawh thu a sawi a, Police ten rang zawka mipuite an puih theihna tur Mizoram Safety App siam anih thu te, hmeichhiate pualin All Women Police Station din thar a nih thu te, traffic dan bawhchhiate langtlang zawka pawisa chawitirna tur e-challan system hman \an a nih tawh thu te a sawi bawk.
Mizoram police raising day lawmnaah hian nikum chhunga police station \ha thlan chhuah, Champhai, Lawngtlai leh Khawzawl Police Station te lawmman hlan an ni a, he ni puala inelna chi hrang hranga ti \hate hnenah lawmman hlan a ni bawk. Police Hqrs. GS Arya Mess-a buatsaih, Inkhawmah hian DGP Pu SBK Singh leh Police hotu pawimawh dangte pawhin thu an sawi a ni.
Mizoram UT-a hlan kai a nih kum, 1972 January ni 21 khan Mizoram IGP hmasa ber Pu inderjit Verma chuan mawhphurhna a la \an a, hei hi Mizoram police din \an ni ah pawm a ni.
