Home Minister Pu Lalchamliana’n tunhnaia Zokhawthara Police tirh luh an nih chhan chu Myanmar-a Leitha, Fertilizer lut tur leh Kuhva Mizorama rawn lut tur Assam Rifles ten an dan avangin buaina chhuak mai thei dinhmuna a din vang a ni a ti.

0
297
views

Nimina MNF Party office Hnam Run inkhawm a hmanpuinaah Pu Lalchamliana chuan, Zokhawthara tunhnaia sipai tirhluh chu mipuite rikrap tumna ni lovin, buaina a chhuak palh thei tih report an dawn avangin buaina chhuak thei tur veng tura tirh luh zawk an ni a ti a, buaina chhuak tih kian aiin buaina chhuak tur ven chu a pawimawh zawk a ni a ti.

Assam Rifles in Feritlizer leh kuhva lut leh chhuak an dan chhan Police hotute a zawhtir hnuah MHA in dang tura hriattirna a pek vanga dang an nih thuin Assam Rifles te hian an lo hrilh tih Pu Lalchamliana hian a sawi a, ramdang nena inrina, International Boundary chu sorkar laipui thununna hnuaia awm a nih avangin State sorkar tan hmalak dan thiam a har tih a sawi.

Pu Lalchamliana chuan, India leh Myanmar ten zokhawthara insumdawn tawn tura inremna an neih tawh chu tun thlengin a taka kalpui ala ni lo tih a sawi a, hei hi kalpui thuai a nih theih nan sorkarin Chief Secretary kaihhruaiin nasa takin \an a la a, a la hlawhtlin loh avangin tuna Zokhawthar a bungraw lut leh chhuak chu dan lova insumdawn tawnna a ni rih a, Taxation dept pawhin chhiah an lak theih loh avangin sum tam tak an chan rih a ni a ti. Sorkar laipui, Mizoram leh Myanmar inremna ang chuan insumdawntawnna hi bungraw chi hrang 62 a kalpui tur a ni a ti.

Pu Lalchamliana chuan, Assam Rifles in Fertilizer an dan avang hian fertilizer tangkhang bag sing 5 vel a awm tih report an dawng tih a sawi.