Hortoki JAC-in Kawnpui leh Hortoki inkar kawngpuiah motor lian kal phal lo

0
388
views

Hortoki Joint Action Committee-in September thla ral hma loh chuan Kawnpui leh Hortoki inkar kawngpuiah motor lian chi kal an phal tawh loh thu an sawi a. Motor lian, rit phurin an khaw kawng a rah chhiat nasat avanga mipuiten harsatna an tawh mek chungchang hi nizan khan Hortoki Joint Action Committee hian a ngaihtuah a, mipuiten harsatna an tawh zel loh nan leh khualzin phur motor, tluang taka a tlan theih nan he kawngpui hi September thla chhung ngeia siam that an phut a, Sairang leh Hortoki inkara rel kawng siamtu, North Eastern Frontier Raliway-in an mamawh hrang hrang buhfai, ei rawngbawlna Gas, Diesel leh mamawh dangte chu 407 Truck aia lian lo hmanga an phur luh an remti thung a. Rel kawng siamtute hi lei an verh zawh hma ngeia he kawngpui hi Blacktop tura an phut bakah an thil phut hi tihhlawhtlin a nih loh chuan harsatna an tawk a nih pawhin an mawh a nih loh tur thu an sawi a ni. Hortoki Joint Action Committee chuan, he kawngpui hi rel kawng siamna hmanraw phur luhna ber a nih avangin motor rit tak takin a zawh nasa hle a, hei vang hian kawngpui a chhe nasa a, ruahtui tlak lai phei chuan mihring tan pawha kal harsa khawpin a chhe thin niin an sawi a. Kawngpui hi siam that ni thin mah se, motor lian rit phurin a zawh reng avangin a tha hman meuh lova, kawng tha an neih ve theih nan September thla ral hma loh chu Motor lian zawh an remti dawn lo niin an sawi.

Hortoki Joint Action Committee-in Kawnpui leh Hortoki inkar kawngpuia motor lian chi kal an phal loh chungchang hi vawiin khan Kolasib Addl. DC, Pu Laltanpuia hovin Kolasib SP, PWD, NEF Railways, Kawnpui VC leh Joint YMA hruaitute nen an sawi ho nghal a, Hortoki Joint Action Committee hruaitute chuan, an khaw kawng a chhiat nasat avang hian hun eng emaw chen kal ta atang khan Ration buhfai leh ei rawngbawlna Gas phur motor a tlan duh tawh lo niin an sawi a. An khaw kawnga Motor lian chi tlan an khap avang hian Rel kawng siamtute chu hnathawh an phalsak lo tihna a nih loh thu leh 407 Truck aia lian lote chu kal an remtih reng thu an sawi a ni.