Vawiina HPC(D) Ex-Volunteer thuchhuah tarlan danin, kum 2018 April ni 2 a Mizoram sorkar leh HPC(D) te inremna rah chhuah, Sinlung Hills Council chu Mizoram State Act hnuaiah din a ni a, Inthlan hma lo kaihruai turin HPC (D) leh Mizoram sorkar chuan interim sorkar dinin tun thla ni 9 khan an term a tawp a, Mizoram sorkarin inthlan an la buatsaih theih loh avangin interim period hi pawh sei a ni a, chutah chuan member te a thar deuh veka thlakin, HPC(D) mi leh sa lo chhuak chu mi 1 chiah telh a ni ta a ni an ti. Chief Executive Member Pu Lalthlamuana Hmar leh Executive Member Pi Melody Lalchhuangzeli te chu HPC(D) mi leh sa ni lo mahse HPC(D) Council-in Interim member atana an pawm thu sawiin, term hmasa-ah pawh lo awm tawhte an ni an ti a. A bak zawng, member thar 11 te chu MNF mi leh sa leh an thawhpuite an ni an ti a, hei hi HPC(D) returnee leh Ex-Hmar volunteer Association chuan an duh lo hle tih an sawi. Sorkarin interim member tur a ruat dan chu HPC(D) leh Mizoram sorkar inremna zah lohna leh hmar mipuite zah lohnaah an ngaih thu sawiin, sut leh turin sorkar an ngen tih an sawi a, member ruat tharte pawh pawm lo turin an ngen tih HPC(D) Ex Volunteer Assn chuan an sawi bawk.
