Hurricane Irma thawkah mi 14 an thi tawh

Caribbean thliarkara thlipui na tak, Hurricane Irma thawkah mi 14 an thi tawh a, he thlipui hian US-a Florida state a pan mek nia hriat a ni. Hurricane Irma hi France ram tiat vela lian niin mi thiamte chuan an sawi a, darkar khata km 290 vela chaka thawkin, tun hnai khan Caribbean biala thliarkar thenkhat a nuai a, in leh lo bakah thil tam tak a chhia a ni. Antigua and Barbuda PM, Gaston Browne-a chuan he thlipui hian Barbuda thliarkar chu luah tlak loh deuhthawin a siam niin a sawi a, nimin lamah khan Dominican Republic leh Haiti ram hmar lam vaukam a nuai leh a, thing kung tam tak a tlu a ni. Satellite video thlalak atanga a lan danin, he thlipui hian Florida a pan mek a, state thuneitute chuan mipuite chu hmun him zawk pana insaseng lawk turin an chah a, khualzinte chu thliarkar hrang hrang awmna, Florida Keys chhuahsan tura hriattir an ni bawk a, Miami mipuite chu thlipui tleh tur avang hian nasa takin an inpuahchah nia hriat a ni. US President, Donald Trump-a chuan Florida mipuite chu fimkhur hle tura chahin, an sa himna chu sorkar ngaih pawimawh ber niin a sawi a, Trump-a hian Florida-a Palm Beach-ah in a nei a, thlipuiin a nuai tawh zinga mi, Saint Martin thliarkarah pawh ram a nei a ni.