India leh Bangladesh inrina hung pawn lama tun thlenga la awm, Tippereghat khuaa chhungkaw 75 bawr vel chu a chhung lama luh phalsak an ni lo.

0
82
views

Tlabung sub-division huamchhunga awm Tippereghat khawtlang hruaituten Tlabunga Zonet reporter an hrilh danin, Covid-19 hripui a len hnu-ah, ramri hung pawn lama awm chhungkaw 7-te chu a chhung lamah an insawn tawh a, hetih lai hian chhan hrang hrang vanga an awmna chhuahsan thei lo nia insawi chhungkaw 75 bawr vel chu tun thlengin ramri hung pawn lamah an la awm a ni.

Tippereghat-a Village Level Task Force leh Young Chakma Association-te chuan ruahmanna siamin, chakkhai mamawh thenkhat chu gate-a hlan chhawngin, ramri hung pawn lama awmte hnenah an pe thin a, ramri hung pawn lama awmte pawh India khua leh tui tho an nih avangin, ram pawna kal lo turin an inkhuahkhirh ve tho tih, Tippereghat khawtlang hruaitute chuan an sawi.

Hetih lai hian, ramri hung pawn lama awmte hian ni khatah tum hnih, zingah darkar 2 leh tlai lamah darkar 2, a vaiin darkar 4 tal ramri hungna hawnsak turin thuneitute an ngen a, hemi chungchang hi Tippreghat khawtlang hruaitute chuan an hriatpui loh thu leh, hung pawn lama awm bikte hmalakna nia an hriat thu, Tlabunga Zonet reporter zawhna chhangin an sawi a ni.