Kum 1966 March ni 5-a India Sorkar-in Bomb hmanga Mizoram a beih hriatrengna ni, Zoram Ni chu vawiin khan MZP bultumin hman a ni a. Chawhma lam chu MZP Vice President, B. Vanlaltana’n a kaihruai a, an pawl President, L. Ramdinliana Renthlei chuan, India-in Bomb hmanga Mizoram a beih hriatrengna ni, Zoram Ni chu Political Party leh pawl thenkhat tih thinur tumna vanga hmang an ni loh thu a sawi a, kha tawrhna nasa tak khan Zofate zingah inpumkhatna leh inunauna tha thlen se, Zoram Ni chu thangthar zel te tan ram hmangaihna thinlung put tharna ni ni thei se an duh vangin he ni hi hmang an nih thu a sawi. L. Ramdinliana Renthlei chuan, Mizo hnam tana Zalenna sualtute zawng zawng kha MZP chuan thinlung takin a ngaisang hle a, tuten emaw sawinep tum an awm thin chu tha lo an tih thu leh Mizo hnam tana an inpekna chu engtikah mah a nep loh tur thu a sawi a. Zalenna sualtute khan Mizote chu mahnia ro inrel duh an ni tih an tilang chiang hle niin a sawi bawk. MZP President chuan, khatih laia India Sorkar khan Mizote nunah thil thleng rapthlak em em, thangthar lo awm zel turte pawhin an theihnghilh tawh loh tur a thlen tir tih sawiin, an thiltih avang khan Mizote lakah ngaihdam an dil tur a ni tih chu MZP ngaihdan a nih thu a sawi a, an thil phut chu engtianga kalpui zel tur nge hrethiam chiah lo mah se, engtik niah emaw chuan ngaihdam an la dil ngei ang tih chu an beiseina a nih thu a sawi a, Mizo hnamin zalenna a neih theih nana nun hlantu leh beitu zawng zawng chu MZP-in a zahin a ngaisang hle tih a sawi bawk.
Chawhnu lamah chuan MZP Chanchinbu Editor, Lalvansanga Pautu kaihhruaiin Pachhunga University College-a Asst. Prof., Pu Lalthlamuana Ralte ziah “March ni 5, 1966 chanchin” tih leh MZP Adviser, Pu Lalhruaitluanga Chawngte-in “Aizawl Bomb leh tunlai Zoram khawvel” tih a ziahte an zirhova, huam zau takin an sawi ho nghal a ni. MZP General Secretary, Lalnunmawia Pautu sawi danin, Zoram Ni hi MZP buatsaihin kum 2008 atang khan kumtin March ni 5-ah hman thin a ni a. India Sorkar-in Bomb hmanga Mizoram a beih leh beih loh chungchanga inhnialna awm thin tihtawp tura he ni hman a nih thu leh India Sorkar khan Mizoram chu Bomb hmangin a bei ngei a ni tih chu an pawm dan a nih thu te a sawi. Kalkhawmte chu India Sorkar-in Mizorama Bomb a thlak vanga nunna chante sun nan ngawi rengin Minute khat chhung an ding a ni.
————–
Prism President, Pu Vanlalruata’n India Sorkar-in Mizoram chu Bomb hmanga a beih avangin ngaihdam a dil tur a ni tih chu an party ngaihdan a nih thu vawiina an party pisa-a inkhawmah a sawi. India-in Bomb hmanga Mizoram a beih champha kum 52-na lo thleng hian Mizo mipuite thinlungah Ram leh Hnam hmangaihna tuh thar se an duh tih a sawi. Pu Vanlalruata chuan, kum 1966 March ni 5-a Mizote laka India chet dan khan Mizote hi Hnam hran, ram hran nei an nih zia a tichiang hle niin a sawi a, an chet dan rawng tak avang khan India chu Mizote hnena ngaihdam dil tura an beisei thu leh an Party-in thuneihna a chan hunah phei chuan na taka India sorkar an nawr tur thu leh India awp hnuaia Mizote ram luah chin zawng zawng chu Mizorama tel tir vek an tum dawn tih sawiin, hmalakna hmasa atan Assam-in a enkawl hawh mek Innerline Forest Reserve mel 509-a zau chu an lalet phawt dawn tih a sawi bawk. He inkhawm hi an pawl Treasurer, Pu HK. Liansawta’n a kaihruai a ni.
———-
Kum 1966 March ni 5-a Jet Fighter ten Mizoram an beih khan Aizawl bakah hmar lamah Khawzawl leh Hnahlan te pawh beih tel a ni a, chhim lamah Hmuntlang, Pukpui, Tawipui, Bunghmun, Mualthuam, Tlabung leh Sangau te pawh Jet Fighter hian a bei a ni.
————–
BJP Mizoram Pradesh pawhin vawiin khan Upper Republic-a an Party Pisa-ah Zoram Ni hi an hmang a. An pawl President, Prof. JV Hluna chuan, Mizo hnam chhan nana Zoram Ni hman a ngai hial chu lungchhiat thlak a tih thu leh he ni hian Mizorama Sorkar awm tawh leh Congress Party-in Mizote a hmangaih lohzia a lantir niin a sawi. Kum 1966 March ni 5 khan Aizawl chu bomb hmanga beih ngei a ni tih Prof. JV Hluna chuan sawiin, Tuikhuahtlanga Bomb an thlak puak ta lo pawh vawiin thlenga a la kawl that thu a sawi a, khatih laia Prime Minister, Pi Indira kaihhruai Congress Sorkar-in Mizote a sawisak dan chu rapthlak a tih thu a sawi a, he ni hi a ruala Mizote lungngaihna ni a ni a ti. Mizoram BJP President chuan, khatih laia Congress Sorkar khan Mizoram chu Bomb hmanga a bei mai ni lovin Mizote chu chim ral vek a tum niin a sawi a, khatih laia Union Home Minister, Gulzarilal Nanda khan Lushai-te chu hnam tlem te an ni a, state hrang hrangah thawn darhin nakin zelah pawh an in hre chhuak thei tawh lo ang a, an ral chhunzawm mai dawn a ni tih tawngkam a chhakchhuak nia sawiin, hmanlai atangin Congress Party chuan Mizo mipuite a hmangaih ngai lo niin a sawi.
He inkhawmah hian BJP chuan tun hnaia thenawm State pathuma inthlanna neih zawh taka BJP hmasawnna an lawm nghal a. An pawl General Secretary, Pu Vanlalhmuaka chuan, Hmarchhak State zingah Mizoram-ah chiah Congress-in thuneihna a chang tawh tih sawiin, kumin kumtawpa Mizoramin Assembly inthlanpui a hmachhawn hunah Mizorama Congress kaihhruai Sorkar pawh paih a ni ve dawn niin a sawi.
