Indian Golf Union President, Wing Commander Satish Aparajit leh India Adventure Captain Satish Pathania ten vawiin khan Larsap Lt. General Nirbhay Sharma chu a chenna Raj Bhavan-ah an hmu. An inkawmna-ah hian Larsap chuan Mizoram sik leh sa awm dan a that avang te, ram ralmuanga nih avang te leh a mawi avangte in khualzinte tan tlawh chakawm tak niin a sawi a, ramchhung hmundang a awm te bakah Asia chhim chhak atang pawha khualzinte pawh hip thei tura siam a duh thu a lo hrilh a ni. Captain Satish Pathania pawhin Ministry of Tourism hnuaiah Mizorama Eco-Adventure Circuit ruahman a nih dan a sawi a, Mizoramah India-a Skywalk hmasa ber leh Asia khawmualpuia Ropeway thui ber chu Aizawla siam tum a nih thu leh Thenzawla Golf Course puitling siam mek leh Adventure Sports tihmasawn tura ruahmanna siam dan te Larsap chu a hrilh bawk a ni.
