Mizoram Sorkar tirha tun hnaia hmarchhak State \henkhat leh Kolkata khawpuia Press Tour-a zin chanchinbu miten vawiin khan an zin Report Aizawlah an pe a, he inkhawm MJA President, Pu Zonunsanga Khiangte kaihhruaiah hian Minister chuan, Press Tour-a kalten Mizoram tana thil \ha hrang hrang an hawn chu lawmawm a tih thu sawiin, hei hian chanchinbu pawimawhna a pholang chiang hlea a hriat thu a sawi a ni. Pu Lalruatkima chuan, chanchinbu mite hma\hatna tur ngaihtuah chhoh zel tum a ni tih sawiin, chumi atana rawtna nei duhte pawh inthlahrung lova finchhuah zel turin a chah bawk. Mizoram neitu Mizote chu kan chhehvela hnam tenau zawkte kuah khawm lamah \anlak an ngai hle nia a hriat thu sawiin, khualzin hip kawngah pawh tun aia nasa zawka inbuatsaih a \ul tih a sawi.
Puan tawh angin Mizoram Sorkar tirhin tun hnai khan Journalist-te chu Nagaland, Sikkim, Meghalaya leh Kolkata-ah Press Study Tour-a tirh an ni a, heng mite hian an zinna thil \ha chi hrang hrang an hmuhte chu vawiin khan Report an pe a. Mizoram tana thil \ha tur nia Press mite sawi chu a theih ang anga bawhzui a nih tur thu IPR Minister, Pu Lalruatkima chuan a sawi a. Press Tour chu buatsaih chhunzawm zel tum a nih thu a sawi bawk. He inkhawmah hian chanchinbu mite bakah IPR hotute an tel a ni.
