Aizawl District hmar lam, Kepran khuaa ar engemawzat seh tawh, Keite chi khat, Kelral chu nimin tuk khan thang hmangin khawtlangin an awk. Kepran VCP, Pu Lalnghilhlova hnen atanga Zonet thu dawn danin, he Kelral hian nikum lam atang khan an khaw chhunga ar an vulhte chu zanah a seh thin a, a chang phei chuan zan khatah ar puitling 8 te a seh hial a, a tirah chuan khawhmawr deuh leh in hnuai biru deuha mite a seh a, kuminah hi chuan khaw chhung laili laiah pawh zan reiah a che ta fo niin a sawi. Kepran VCP chuan Kelral hi tihhlum leh kah mai duh pawh an awm na a, ramsa vang tak a nih tawh avang leh danin a phal loh avangin an inkhap hram hram niin a sawi a. Pawi a khawih zel loh nan Zawngkhar an kam a, ar an tawktarh a, nimintuk khawvar hma, dar 3 vel khan Kelral hi an awk ta niin a sawi. He Kelral hian Kepran khaw ar 100 chuang lai a seh tawh a, Uipui pakhat a seh hlum tawh niin a sawi bawk. Kepran VCP chuan an khaw chhehvelah hian Kelral dang pawh a la awm nia an hriat thu sawiin, Kelral chet dan hi Forest department pawh an hriattir tawh niin a sawi a, ar a sehsak te hi chhungkaw harsa tak takte an nih avangin, Forest department hian zangnadawmna pek dan ngaihtuah se an duh thu a sawi bawk.
