COVID 19 hri leng mek a darh loh nana Sorkar laipuiin Pathianni-a mipuite pawnchhuak lo tura a ngen hlawhtling taka kalpui a nih hnuah Mizoram sorkar chuan mipuite chu kar khat chhung pawn chhuak lo turin a ngen chunzawm a. He thupek kenkawh \an ni nimin khan mipuiten thupek zawm \ha thawkhat mah se, khawlaia chhuak hmuh tur an awm nual a, hmun hrang hranga Duty-te chuan Sorkar-in thuneihna a pek anga Local Level Task Force a\anga pawn chhuah phalna nei an tam avangin mipui veivak an tam tih an sawi a, vawiin lamah erawh khauh zawka thupek kenkawh a nih avangin pawn chhuak hmuh tur an awm meuh lova, \ul bik tak tak thila chhuak lo chu khawlaiah hmuh tur an awm mang lo a ni. Zonet-in veng hrang hrang a tlawh kualnaa Local Level Task Force leh Police Duty-te chuan \ul bik thilah lo chuan pawn chhuah phalna hi pek ni lo se an duh thu an sawi hlawm a, nimin lamah khan chawhmeh lam ngai tih leh thil ho mai maia pawn chhuah phalna pek a awm nual avangin Duty-te tan pawh a luhai thlak hle a, hetiang hi a thlen tawh loh nan veng hrang hranga thuneitute chu fimkhur turin an duh tih an sawi.
Inkharkhipna kalpui a nih chhunga mipuiten ei leh bara harsatna an tawh lohna tura Sorkar-in eichawp dawr leh damdawi zuarte inhawn a phalsak chu Local Level Task Force-ten an huam chhung \heuhah an enzui hlawm a, veng \henkhatah chuan dawr hawn theih hun chhung bituk siam a ni a, veng \henkhat nilenga dawr hawn khap te pawh an awm a ni. Aizawla damdawi zawrhna hmunpui Civil Hospital chhehvelah pawh damdawi dawr inhawng a awm nual a, dawr zawng zawng erawh an inhawng vek lova, dawr inhawngte pawh dawrtu an awm mumal lo a ni.
