Kolasib-a ICAR building thar CM-in hawng

0
445
views

Chief Minister, Pu Lal Thanhawla’n vawiin khan Kolasib-a Indian Council of Agriculture Research (ICAR) building thar a hawng. He ICAR Complex-ah hian Scientist Home, Type IV Quarters, Seed Processing Unit leh pa chi siamna leh pa khawina hmun a awm bawk a ni. Hawnna inkhawmah hian Climate Change: Agriculture Adaptation & Mitigation Strategies in Mizoram tih thupuia hmangin workshop neih a ni a, he workshop hi Chief Minister hian a hawng nghal a ni. Hawnna thusawiin Chief Minister chuan Indian Council of Agriculture Research chu India rama ei leh bar lama intodelhna tur leh tam zawk thar chhuahna tura zirna in pawimawh a ni tih a tarlang a, ICAR hmunpui Kolasib-a hawn tak chuan Mizoramah lo neitute leh thlai chingtute nasa takin a tiphur thar dawn niin a sawi a, khawvel mihring pung chho zelten hmasawnna tura hna an thawhnaah khawvel tuamtu boruak sik leh sa leh thing leh mau tihchhiat zel a nih avangin he thil tha lo thleng zel ven kawngah pawh tan lakna pawimawh tak a ni dawn niin a sawi a ni. Chief Minister chuan khawvel mithiamte tih tur pawimawh tak awm chu environment tichhe lova mipuite ei tur kham khawp thar chhuah dan ngaihtuah hi a ni a ti a, heta tana thil tangkai hi Mizoram sorkar hmalakna lian ber NLUP-ah a tel vek niin a sawi a, NLUP chhunzawm nan NEDP hman niin a sawi bawk a ni.