KTP General Conference-ah hruaitu thar thlan, palai ro rel

0
1889
views

West Phailenga KTP General Conference-ah vawiin a ni thum ni khan hruaitu thar thlan a nih bakah rorel palaiten ro an rel. Kum 2018 atanga 2020 thlenga Central KTP hruaitu thar turte chu Synod Moderator, Rev. F. Lalrinnunga kaihhruaia thlan an ni a, thlantlin mi 20 te chu Pu Lalruatfela, Bawngkawn Bial, T/Upa Ricky Lalrammawia Ralte, Bawngkawn Bethel Bial, T/Upa Lalsiammawia Pachuau, Bethlehem Venglai Bial, Pu David Lalhmachhuana, Armed Veng Bial, Pu K. Lalengzama, Chanmari Bial, PC Lalrinsanga, Dawrpui Bial, Pu R. Lalbiakmawia, Dawrpui Vengthar Bial, Upa Rosangliana, Electric Veng Bial, Upa K. Lalnuntluanga, Hlimen Bial, T/Upa Lalrinmawia Ralte, Khatla Bial, Pu Lalmuanawma, Kulikawn Bial, Lalrinchhana Ralte, Mission Veng Bial, Pu Malsawmtluanga, Mission Vengthlang Bial, K. Lalchhanhima, Ramhlun North Bial, Pu Rorelkima, Ramhlun Bial, Robert Lalduhzuala, Ramthar Bial, C. Malsawmtluanga Republic Bial, Benjamin Lalnunpuia, Vaivakawn Bial, Dr. David C. Lalfakawma, Zemabawk Bial, Dr. Lalrotluanga, Zonuam Bial te an ni. Central KTP hruaitu tur thlannaah hian a pumpuiin vote 943 a tla a ni. Thlantlin tak te atang hian Office Bearers tur te chu ruat an ni anga, chu chu naktuk, Pathianni zan inkhawmah puan a ni ang a, Moderator-in Pathian hnenah a hlan nghal dawn a ni.

Hemi hmalam hian Synod Executive Committee chuan KTP Leader atan, Rev. Dr. Lallawmzuala leh Secretary atan Pu Rochungnunga, Worship Deptt. Coordinator ni lai a lo ruatfel tawh a ni. Kumpuan thupuiah Zuangtui Bial rawtna “Kristian nun takna” tih chu pawm a ni. Vawiina rorelnaa thutlukna pawimawh dang siam zingah chuan kum 2018-2019 chhunga Central KTP budget atan Rs.48,20,000/- pass te, Falkland Venga Youth Recreation Centre sak mek chhunzawm nan Aizawl khawpuia member ten Rs.50/- theuh, District Capital-a member ten Rs.30/- theuh leh hmun dang zawnga member ten Rs.20/- theuh thawh se tih te, kum 2018 hian KTP zan khat inkhawm thawhlawm YRC sak nan lak khawm ni se tih te, Synod Hospital Charity Fund pualin KTP vawi khat inkhawm thawhhlawm pek ni se tih te, Mizoram pum huapin chhawmdawlna pual budget atan zan khat inkhawm thawhhlawm pek ni se tih te a tel a, kumina Mizoram Assembly inthlanna neih tur atan leh sual thupha chawina atan Mizoram pum huapin tawngtai beihpuithlak ni se, a hun tur chu Central KTP-in ruahman se tih te, CKTP-in HIV/AIDS chungchang inzirtirna a neih mek chu chhunzawm zel ni rawh se tih te an pass bawk a ni. Rorel hlan hian Pandal-ah zai ho a ni a, West Phaileng Bialtu Pastor kaihhruaiin “Duhthlanna tih thupui” zirho a ni bawk a, he thupui hi Upa Dr. Lalnundanga’n a sawi hawng a ni. Vawiin chawhnu khan West Phaileng Bial Chairman, Pro. Pastor, V. Lalmuanpuia kaihhruaiin Ramthar hawi inkhawm neih a ni a, hetah hian ”Chanchintha hril tura koh thalaite” tih thupui hmangin Missionary Training College Aizawla thawk, Pi Vanlalthawmi chuan thu a sawi a ni. Zaninah pawh Pathian biak inkhawm neih leh a ni ang a, hetah hian thupui sawi tura ruat Rev. Vanlalzuata’n “Isua chhinchhiahna put” tih hmangin Pathian thuchah a sawi dawn a ni. Tun tum KTP General Conference-ah hian palai kal an thahnem hle a, vawiin chawhnu thlenga inziaklut palai zat chu 15,874 an tling a ni. KTP General Conference hi ZONET chuan zanin hian Bawhbel Channel-ah Live-in a pe chhuak a, naktukah nilengin Zawlbuk Channel-ah a pe chhuak dawn a ni.