Member 25 awmna Lai Autonomous District Council-ah hian Congress Member 4, MNF Member 8 leh Independent member 1 ten United Legislature Party an din a, LADC-a Congress sorkar dinglai CEM, Pu T. Zakunga kaihhruai chu a tlu dawn tih a chiang thawkhat ta a ni.
Congress Member pali, LADC Chairman, Pu V. Zirsanga, Executive Member, Pu Lallawmsanga Apetow, Deputy Chief Whip, Pu ST Laldailova leh CEM hlui, Vengpui bialtu MDC, Pu VL Hmuaka leh MDC Independent Member, Deputy Chairman, Pu LR Dingliana Chinzah te chuan tukin khan Lawngtlai Circuit House-ah MNF General Hqrs Treasurer Pu Vanlalzawma leh General Secretary Pu TC Pachhunga te hriatpuinain an hruaitu atan Pu V. Zirsanga an thlang a ni.
Lawngtlai Bazara MNF Party Office-a vawiina inkhawm buatsaihah United Legislature Party Leader thar Pu V. Zirsanga chuan thu sawiin, sorkar dinglaiah lungawi lohna an neih loh thu a sawi a, State-ah MNF a sorkar vangin hmasawnna mamawh ber LADC mipuiten chak zawka hmasawnna an neih theih an beisei vangin United Legislature Party chu an din tih a sawi.
United Legislature Party-in Deputy Leader atana an thlan, Lawngtlai MNF District Hqrs. President, Pu Manghmunga Chinzah chuan langtlang sorkar an din dawn tih sawiin sorkar thar din turin a rang thei ang berin Larsap hnenah thu an thlen dawn niin a sawi bawk.
Tun dinhmunah LADC-ah hian Pu T. Zakunga kaihhruai Congress Legislature Party chuan Member 12 an nei a, an ni bakah hian sorkar b<knaa vote nei thei lo, nominated member pathum an nei tel a, United Legislature Party ten Member 13 neiin, LADC-ah sorkarna siam thei khawp Member an nei ta a ni.
MNF Party-in LADC-a sorkarna siam hrim hrim chu an tum ber a ni em tih Lawngtlaia Zonet reporter zawhna chhangin MNF General Secretary, Pu TC Pachhunga chuan Democracy ramah sorkarna siam chu tum bulpui ber nimahse, LADC-ah hian sorkar dinglai duh khawp lohna a lian a, a chhunga mite nen hmasawnna hna chak zawka thawk thei turin sorkar thar din tura hmalak a ni ta tih a sawi.
