Leng khuaah Faina Beihpui inkhawm

0
460
views

Serchhip District-a Leng khua-in faina kawnga hma an lakna kal zelah vawiin khan khawtlang huap “Faina Beihpui thlak” an hman chu SIRD & PR Director, Pi Maria CT Zuali, ZONET Managing Director, Pu RK. Lianzuala leh East Lungdar BDO, Pu Vanlaltanpuia’n an hmanpui a. Hemi puala inkhawm, Saihnuna Hall-a neih chu an khaw VCP Pu B. Vanlalfinga’n a kaihruai a, SIRD & PR Director, Pi Maria CT Zuali chuan faina chu hmasawnna tura kawng pawimawh pakhat a nih thu leh, faina kawnga Leng khaw VC leh tlawmngai pawl hruaitute hmalakna chuan zirlaite zingah rahtha a chhuah a beisei thu leh an khua atanga mithiam tak tak an chhuah zel a beisei thu a sawi.

ZONET Managing Director, Pu RK Lianzuala pawhin, faina leh thianghlimna chuan hriselna leh dam reina a keng tel tih sawiin, Mizote chu hmanlai atangin hnam bal leh tawp tak ni thin mah ila, sorkar hmalakna leh ram changkang zawkte tih dan entawnin hmasawnna nasa tak a awm tawh tih a sawi a. Bawlhhlawh bawm tih avanga tin chhia bal tak hun ringawt chu a dik loh thu leh, hemi hriaa Leng khua-in bawlhhlawh bawm fai nalh tak an siam chu lawmawm a tih thu leh Leng VC ten anmahni sum thawh chhuah hmanga hmasawnna hna tha tak an thawk chu lawmawm a tih thu a sawi bawk.

East Lungdar BDO, Pu Vanlaltanpuia pawn thu sawiin Leng khuain Model Village a puangtu pawh awm lova anmahnia Model Village-a an inpuang ngam chu fakawm a tih thu leh party sawi lova faina kawnga an inlungrualna chu fakawm a tih thu a sawi. Vawiina Leng khua-in faina beihpui an thlak puala Leng VC-in mipuite hnen atanga rawtna leh sawiselna thlen theihna tur bawm an siam chu SIRD & PR Director, Pi Maria CT Zuali’n a hawng a, thing tiak engemawzat an phun nghal a, tlaiah khawtlang huapin ruai an theh bawk. Leng khuaa Clean & Beauty Committee chuan Krismas dawnah mahni in leh a vel leh inchhung khur fai ber thlan an tum a ni.