Lottery chungchang chhui chiang tura CBI ko lut tura CM an ngenna chungchangah, CM leh Chief Secretary thu a inkalh- MNF

0
378
views

MNF party-in Lottery chungchang chhui chiang tura CBI ko lut tura CM an ngenna chungchangah, CM leh Chief Secretary thu a inkalh nia sawiin, thudik sawi turin CM, Pu Lal Thanhawla an phut. Hemi chungchangah hian tukin khan MNF MLA, Dr. K Beichhua hovin MNF thalai engemawzat chu CM hma lak dan hre chiang tura CM hmuh tumin a pisaah an kal a, CM hi an hmuh theih loh avangin a Private Secy, Pu Alex V Chawngthu chuan CBI ko lut tura MNF-in an ngenna, CM-in a chhanna lehkha a lo pe a. He lehkhaa a inziah dan chuan, kumin August ni 10-a Mizo Carbon leh Lottery chungchang chhui tura an ngenna chu, ngen nawn a ngaih loh thu leh a theih ang anga hma a lak thu a ziak a. Mizo Carbon bikah hian High Court-a PIL thehluhah Lal Thanhawla, H Rohluna, Zodintluanga leh Lalsawta te hming tarlan a ni a, High Court chuan, heng mite hming hi a paih leh a, heti chung hian ACB chhuitir a ni a, ACB in officer dik lo a sawite chu an hna atanga chawlhtir an ni tawh a, he thubuai hi High Court-a awm mek a nih avangin CBI chhui theih a ni rih lo niin a sawi.

Lottery chungchangah pawh CBI chhuitir turin Chief Secretary a hrilh tawh thu leh, Lottery Agent-te, Court-ah an inkhin avangin CBI chhuitir theih a la ni lo niin CM chuan a sawi a, Lottery hi Public Accounts Committee-in a ngaihtuah lai a nih bawk avangin Assembly Secretariat-in mi dang chhuitir theih loh a nih thu an sawi a, hemi chungchang hi Dy Speaker-in a lo sawi lang tawh niin a sawi bawk. Hetiang hi thil awm dan ni mah se, heng thubuai hi CBI chhuitir a phur thu leh an chhui dawn a nih rau rau chuan, kum 1999 atanga chhui law law tul a tih thu te, hun remchang hmasa berah chhuitir a nih tur thute a sawi bawk. MNF thalaite chuan, Lottery chungchang, CBI chhuitir turin CM-in Chief Secretary a hrilh tawh nia a sawi chu thu dik lo nia an hriat thu an sawi a, Chief Secretary an kawmnaah Lottery chungchang chhui tura CBI ko lut turin sorkar atangin hriattirna a la dawn loh thu a sawi niin an sawi a ni.