Lunglei BCM Ramthar Biak In-a khung hran lai hmeichhe 9 te chu an swab sample lak nawn leh a ni dawn.

0
107
views

An sample lak atanga ni 10 hnu-ah pawh an result a chhuah theih loh avangin heng hmeichhe pakuate hian chaw ngheiin sorkar an lo nawr tawh a ni.

Zonet JB Lunglei-in BCM Ramthar Biak In-a hmeichhe 9 awm mekte hi a be pawp a, June ni 6-a lak tawh an sample result an beisei mek laiin an sample hi lak nawn a nih tur thu Damdawi lam hotuten an hriattir a ni.

Lunglei Chief Medical Officer, Dr Thani Pachuau chuan Zonet JB zawhna chhangin test hmasa result hriat hmaa vawiina an Swab Sample lak leh tura tih chungchangah thuneitu sang zawk ten ti tura an tih ang chu an zawm mai a ni tih a sawi.

BCM Ramthar Biak Ina hmeichhe 9 quarantine mek te hian May ni 31, khan Lunglei an thleng a. Hemi zanah hian an swab Sample lak sak nghal an ni a, June ni 4 –ah an swab Sample test result a chhuak a, an zinga pakhat Positive a nih avangin dah hran nghal a ni.

Dah hran a nih hma ni 4 chhung an chen ho hman avangin June ni 6-ah heng hmeichhe 9 te hi an sample lak sak leh an ni a, result a chhuah mai theih loh avangin a ni 10-na, Thawhlehni khan chaw ngheiin thuneitute an nawr a, thuneituten an result tih chhuah thuai a nih theihna tura hmalakpui an tum thu an hrilh hnuah lungawi lohna an lantir hi an ti tawp leh nghal a ni.