Lunglei District chhung Buarpui khuain hnianghnar zawka tui thianghlim an hmuh theihna tur, cheng nuai 400 senga nizung chakna hmanga tui pump chhuahna chu vawiin khan hlawhtling taka tih nun chhin a ni.

Lunglei PHE SE Pu Ngentluanga hovin khawl enchhinna hi neih a ni a, khawchhunga tui sem darhna siam hna pawh thawh chhoh mek a ni tih PHE hotute chuan an sawi a, he tuilakna tur hian Buarpui khaw mipui an pun chhoh dan tur mila chhuta kum 30 chhung chawm thei tura ruahman a ni.
Lungphun lui tui pump chhuahna tur hian ni zung chakna kilowatt 40 pe chhuak thei khawl bun a ni a, darkar khatah tui litre 11000 a pump chhuak thei a ni.